Elimizdiń ornyqty kólik ınfraqurylymyn damytý maqsatynda Tuńǵysh Prezıdent – Elbasy Nursultan Nazarbaev bastamashy bolǵan «Nurly jol» memlekettik baǵdarlamasynyń oryndalý barysyna basa kóńil bólindi.
Shyǵys Qazaqstan oblysynda Asqar Mamın «О́skemen – Taldyqorǵan» avtojolyn salý jobasyn iske asyrý barysyn qarady. Bıyl 265 shaqyrym jolda qozǵalysty ashý kózdelgen. Jalpy, uzyndyǵy 763 shaqyrym bolatyn jol 2020 jyly paıdalanýǵa tolyqtaı beriledi. Bunymen qosa, «Qalbataý – Maıqapshaǵaı» trassasynda rekonstrýksııalaý jumystary júrgizilip jatyr, onda jyl sońyna qaraı 135 shaqyrym avtojol paıdalanýǵa beriledi.
Alakól kóliniń jaǵalaýynyń shyǵys bóliginde sońǵy eki jylda 5,3 mlrd teńgege aýqymdy jumystar júrgizilgen. Jaǵalaýdy damytý jumystary jalǵasýda, jaǵalaý jıegindegi adamdar serýendeıtin jol keńeıtildi. Bıyl 31 mlrd-tan astam teńgege 8 iri ınfraqurylymdyq nysandy iske asyrýdy bastaý kózdelgen: 250 orynǵa arnalǵan «Kerýen Plaza» qonaq úıi, emdeý-saýyqtyrý kesheni, velosıped pen jaıaý júrginshilerge arnalǵan joldar salynady, park keńeıtiledi jáne t.b. Bıyl shyǵys jaǵalaýǵa 650 myń týrıst keledi.
Almaty oblysynda Úkimet basshysyna uzyndyǵy 355 shaqyrymdaı bolatyn «О́skemen – Taldyqorǵan» avtojolynyń shyǵys bóligin rekonstrýksııalaý, uzyndyǵy 184 shaqyrym bolatyn «Úsharal – Dostyq» avtojolyn salý jobasy týraly baıandaldy.
Asqar Mamın Aqshy aýylyndaǵy Alakól kóliniń qorshaýshy bógetiniń qurylys ornyn tekserdi. Nysan jaǵalaýǵa jaqyn ornalasqan aýyldardyń 2,5 myńnan astam turǵynyn tolqyndardyń saldarynan qorǵaýǵa múmkindik beredi.
Sondaı-aq, Premer-Mınıstr Alakól kóliniń jaǵalaýyndaǵy demalys aımaǵyn abattandyrý jumystarymen tanysty. О́ńirde 200-den astam týrıstik nysan iske qosylǵan, 450 orynǵa arnalǵan «QOQTEM GRAND RESORT» jańa qonaq úı kesheni paıdalanýǵa berilýde. Bıyl jańa qonaq úıler, servıs nysandaryn salý arqyly týrıstik áleýetti damytý sharalary jalǵastyrylady. Bıyl Alakól kóliniń ońtústik jaǵalaýyna 1,3 mln týrıst keledi dep boljanǵan.
Qaraǵandy oblysynda «Qaraǵandy – Balqash» avtojolynyń ýchaskesindegi jumys tekserildi. Atalǵan joba boıynsha bıyl 187 shaqyrymda jol qozǵalysy ashylady. Nysandy tolyq paıdalanýǵa berý 2020 jylǵa josparlanǵan. «Qaraǵandy – Temirtaý» jáne «Qaraǵandy q. aınalma joly» jobalary boıynsha jumystar jyl sońyna deıin 61 shaqyrym joldy paıdalanýǵa berýmen aıaqtalady.
Premer-Mınıstr Asqar Mamın Shyǵys Qazaqstan oblysy joldarynyń ýchaskelerindegi qurylystyń joǵary qarqynmen júrip jatqanyn atap ótip, Almaty jáne Qaraǵandy oblystarynyń nysandary boıynsha qurylys jumystarynyń ekpinin kúsheıtýdi tapsyrdy. Qarqyndy jumys rejımi men jedeldetilgen jumyldyrý úshin jobalar qurylysynyń merzimderine tıisti túzetýler engizý qajet. Úkimet basshysy jergilikti turǵyndardy obektilerdi iske asyrýǵa tartýdyń, eńbekaqy tóleýdiń qajetti jaǵdaılaryn qamtamasyz etýdiń jáne qazaqstandyq qamtý úlesin arttyrýdyń mańyzdylyǵyn atap ótti.
«Infraqurylym jumys isteýi kerek. «О́skemen – Taldyqorǵan» jáne «Qaraǵandy – Almaty» jobalary boıynsha mindet – 2020 jyly joldaǵy qozǵalysty ashý. Sapa máselesi negizgi basymdyqta bolýy qajet», — dedi A. Mamın. — Alakól kólinde týrıstik áleýetti damytý jumystaryn jalǵastyrý qajet. Bıyl shyǵys jáne ońtústik jaǵalaýlarǵa 2 mln-ǵa jýyq týrıst keledi».