Juma, 1 naýryz 2013 7:07
Qys aılary Qarýly Kúshter úshin qarbalasqa toly. 2013 jylǵy oqý baǵdarlamasyna sáıkes áskerlerde birinshi jartyjyldyqqa josparlanǵan is-sharalardyń deni jaýyngerlik ázirlikti arttyrýǵa arnalǵan.
Astanada shoǵyrlanǵan desantty-shabýyldaýshylar bólimi buqaralyq aqparat quraldary ókilderine arnap jeke quramynyń bir kúndik jaýyngerlik qyzmetin kórsetti. Búginde osy bólimdegi desantshy sarbazdardyń oqý daıyndyǵy úshin barlyq qajetti jaǵdaılar jasalǵan. Oqý-materıaldyq baza jetkilikti. Nusqaýshylardyń denin joǵary bilikti ofıserler quraıdy.
Juma, 1 naýryz 2013 7:07
Qys aılary Qarýly Kúshter úshin qarbalasqa toly. 2013 jylǵy oqý baǵdarlamasyna sáıkes áskerlerde birinshi jartyjyldyqqa josparlanǵan is-sharalardyń deni jaýyngerlik ázirlikti arttyrýǵa arnalǵan.
Astanada shoǵyrlanǵan desantty-shabýyldaýshylar bólimi buqaralyq aqparat quraldary ókilderine arnap jeke quramynyń bir kúndik jaýyngerlik qyzmetin kórsetti. Búginde osy bólimdegi desantshy sarbazdardyń oqý daıyndyǵy úshin barlyq qajetti jaǵdaılar jasalǵan. Oqý-materıaldyq baza jetkilikti. Nusqaýshylardyń denin joǵary bilikti ofıserler quraıdy.
Jýrnalıster desantshylardyń oqý-jattyǵýlary ótip jatqan birneshe oqý núktesinde bolyp, olardyń kúndelikti jaýyngerlik daıyndyqtaryna kýá boldy.
Desantshy-jaýyngerler aldymen áýe desanty kesheninde ótkiziletin jattyǵýlarymen tánti etti. Odan soń kedergi jolaǵyndaǵy kúrdeli qımyldardy pysyqtady. Bul jerde árbir áskerı qyzmetshi úshin mindetti túrde atletızm, tez arada sheshim qabyldaý sııaqty qasıetterdi ıgerý shart.
Elordadaǵy desantshylar bólimi qurylǵan kúnnen beri astanamyzda ótip turatyn memlekettik jáne halyqaralyq saıası mańyzy bar is-sharalardyń qaýipsizdigin qamtamasyz etýge atsalysyp keledi. Osydan birer jyl buryn bas qalamyzda bolyp ótken Azıada oıyndary men EQYU sammıtinde qaýipsizdikti baqylaýǵa tartylǵan bolatyn. Osyndaı memlekettik mańyzy bar is-sharalardaǵy arnaıy jabdyqtalǵan blog-beketterdegi qyzmetin olar búgin de jurt nazaryna usyndy.
Odan soń desantshylar buqaralyq aqparat quraldary ókilderine arnap bólim qoldanysyndaǵy zamanaýı baılanys quraldarynyń múmkindikterin kórsetti. Jeke qarýdan atyp, jattyǵyp jatqan jaýyngerlerdiń sabaqtarymen tanysty.
Kógildir beretti desantshylardyń jaýyngerlik ázirligin jekpe-jek urysynsyz elestetý múmkin emes. Muzdaı qarýlanǵan, shynyqqan shymyr jigitter kórsetken bul urys túriniń elementteri desantshylardyń erjigit degen atqa laıyq ekenin taǵy bir ret dáleldedi. Odan soń jýrnalıster bólimniń bronedromynda bolyp, T-72 tankisiniń jaýyngerlik múmkindikterin baqylady.
Jýrnalısterge shaǵyn suhbat bergen bólim komandıri general-maıor Almas Jumakeev:
– Bizdiń sarbazdar kúndelikti oqý-jattyǵýlar barysynda kásibı tájirıbelerin jetildirip, jaýyngerlik sheberlikterin arttyrýǵa múmkindik alady. Sol sebepti desantshylarǵa júkteler negizgi tapsyrma moraldyq jaǵynan turaqty, densaýlyǵy myqty, saýatty, kez kelgen tapsyrmany oryndaýǵa qabiletti kásipqoıdy daıyndaý bolyp tabylady, – dedi.
Dastan KENJALIN,
«Egemen Qazaqstan».