– Túrkııa bizge táýelsizdigimizdiń alǵashqy kúnderinen bastap qoldaý kórsetip keledi. Bizdiń memleketterimiz ben halyqtarymyz bir-birine óte jaqyn. Eki el arasynda vızasyz rejim engizdik. Qazaqstan men Túrkııa qarym-qatynastary jyl saıyn nyǵaıyp keledi. Osy baǵyttyń jalǵasa túsetinine senimdimin, – dedi Elbasy.
Sonymen qatar, Nursultan Nazarbaev Túrki keńesi aıasynda memleketaralyq baılanystardy damytýdyń qajettigin aıtty.
– Túrkitildes memleketterdiń yntymaqtastyǵy keńesi túrki halyqtarynyń arasyndaǵy baılanystardy damytý jáne nyǵaıtý maqsatymen qurylǵan bolatyn. Bul jumystardy jalǵastyrǵan jón. Men jan-jaqty qoldaý kórsetemin, – dedi Qazaqstannyń Tuńǵysh Prezıdenti.
M.Chavýshoglý Elbasyǵa rızashylyq bildirip, jaqyn arada Túrkııaǵa kelý týraly Rejep Erdoǵannyń shaqyrýyn jetkizdi.
– Sizdiń Elbasy, Qaýipsizdik Keńesiniń jáne «Nur Otan» partııasynyń tóraǵasy retinde Qazaqstan halqynyń ıgiligi jolyndaǵy jumystardy belsendi jalǵastyryp jatqanyńyzǵa qýanyshtymyz. Sizdiń Qazaqstandy órkendetý jáne eki jaqty qarym-qatynastardy damytý isine ólsheýsiz eńbek sińirgenińizdi jaqsy bilemiz, – dedi Túrkııa Respýblıkasynyń Syrtqy ister mınıstri.
Kezdesý barysynda taraptar kún tártibindegi halyqaralyq jáne óńirlik ózekti máselelerdi talqylady.
Sońynda Túrkııa Respýblıkasynyń Syrtqy ister mınıstri Túrki keńesi memleketteri kóshbasshylarynyń qabyldaǵan sheshimine sáıkes, túrki álemi elderin damytýǵa zor úles qosqany úshin Nursultan Nazarbaevqa Túrkitildes memleketterdiń yntymaqtastyǵy keńesiniń ǵumyr boıǵy qurmetti tóraǵasy mártebesi berilgenin málimdedi.