Keńeste sharýalardy sapaly tuqymdarmen, JJM-men, aýyl sharýashylyǵy tehnıkasymen qamtamasyz etý, suranysqa ıe aýyl sharýashylyǵy daqyldarynyń aýdandaryn ártaraptandyrý, sýbsıdııalaý máseleleri qaraldy.
Aýyl sharýashylyǵy mınıstri S. Omarov qazirgi tańda barlyq óńirler kóktemgi-egis jumystaryn júrgizýge kiriskenin, al ońtústik óńirlerde egis jumystary aıaqtalýǵa taqap qalǵanyn aıtty. Egistiń jalpy aýdany 22,3 mln gektardy quraıdy, onyń ishinde kóktemgi egis aýmaǵy — 19 mln ga. Dándi daqyldar 14,5 mln ga alqapqa egiledi Sharýalardyń tuqymǵa degen qajettilikteri 100% qamtamasyz etildi: bıylǵy eginge shamamen 2,5 mln tonna tuqym sebildi, bul ótken jylǵydan 100 myń tonnaǵa artyq.
Zııankester men aramshópterden qorǵaý maqsatynda qajetti qorektik zattar men óńdeýge arnalǵan preparattar satyp alynǵany atalyp ótti. Búginde 267,1 myń tonna tyńaıtqysh tıeldi, onyń 60% — otandyq óndirýshilerden alynǵan.
2018 jyly aýyl sharýashylyǵy tehnıkalary 3,5%-ǵa jańartyldy. Jalpy alǵanda, jumysqa 147 myń traktor, 4 myń birlik ónimdiligi joǵary egis jıyntyqtary tartylǵan.
Memlekettik qoldaý sharalarynyń aıasynda 50,6 mlrd teńge somasyna 1770 aýyl sharýashylyǵy taýar óndirýshisi qarjylandyryldy.
О́z kezeginde Energetıka mınıstri Q. Bozymbaev sharýalardy janar-jaǵarmaı materıaldarymen qamtamasyz etý barysy týraly baıandady. Naýryz–maýsym kezeńinde kóktemgi dala jumystaryn júrgizýge 380 myń tonna dızel otyny bólindi. Búgingi tańda qajettilik kóleminiń 81% tıeldi. Energetıka mınıstrligi belgilegen dızel otynynyń baǵasy lıtrine 160 teńgeni quraıdy (193 myń teńge/tonna), operatorlardyń jetkizý baǵalaryn eskergende óńirlerdegi ortasha baǵasy — 174 teńge/lıtr, bul naryqtyq baǵadan 18 teńgege arzan.
Túrkistan, Almaty, Jambyl oblystarynyń basshylarynyń jáne soltústik óńirler — Aqmola, Qostanaı, Soltústik Qazaqstan oblystarynyń ákimderiniń óńirlerde egis naýqandaryn júrgizý týraly baıandamalary tyńdaldy. Barlyq óńirler tuqymdardyń qajetti kólemimen qamtamasyz etilgen, JJM jetkizýde másele joq.
Keńes qorytyndysyn shyǵara otyryp, Premer-Mınıstr Asqar Mamın egis naýqanynyń qanaǵattanarlyq qarqynyn atap ótti.
«Egis jumystaryn ońtaıly agrotehnıkalyq merzimde uıymdastyryp, aıaqtaý – basty másele», — dep naqtylady A. Mamın.