- Atyraý oblysynda sportty damytýǵa barlyq jaǵdaı jasalǵan. Osyndaı sharalar ótkizý arqyly sportty, salamatty ómir saltyn nasıhattaýdy maqsat ettik. Festıvalde sporttyń 20 túri boıynsha chempıondar óner kórsetti. Solardy kórip, ata-analar balalaryn sport seksııalaryna alyp keledi dep úmittenemiz. Jalpy óńirde sportpen shuǵyldanatyn adamdar sany jyl saıyn artyp keledi, - deıdi oblystyq dene shynyqtyrý jáne sport basqarmasynyń basshysy Rınat Ibragımov.
Oblys ortalyǵyndaǵy Beıbarys alańynda ótken sharada sporttyń 20 túri týraly qoıylymdar qoıyldy. Sondaı-aq, otandyq estrada juldyzdary men jergilikti ónerpazdardyń konserttik baǵdarlamasy merekelik kóńil-kúı syılady. Kórermenge óńirdegi sport zaldary men seksııalar jaıly jazylǵan aqparattyq paraqshalar taratyldy.
Festıval qonaǵy bolǵan tanymal ánshi Erke Esmahan jaqynda Atyraýda erlikpen qaza tapqan polısııa qyzmetkeri Shalqar Aqymǵalıevke arnaǵan «1001 tún» ánin oryndap berdi. Jas sarbazdyń ómirinen syr shertetin án shyǵaryp, beınebaıan túsirgen ánshige Shalqardyń áriptesteri rızashylyq bildirip, alǵys hat tabystady.
- Jaýyngerlik óner assosıasııasy bul festıvaldi jyl saıyn dástúrli túrde ótkizýdi josparlap otyr. Qatysýshylardyń da, kórermenniń de kóńilinen shyqqan shara bolǵanyna qýanyshtymyz, - deıdi assosıasııanyń aımaqtaǵy bólimshesiniń basshysy Erlan Tabyldıev.
ATYRAÝ