Konkýrs jyl saıyn úsh deńgeıde (aýdandyq, oblystyq jáne respýblıkalyq) ótedi. Bıyl baıqaýdyń sharty boıynsha sáýir aıynda Nur-Sultan qalasy turǵyndary arasynda ótinishter qabyldanǵan. Nátıjesinde 70-ke jýyq otbasy baq synaýǵa nıet bildirip, tıisti qujattaryn tapsyrdy.
– Olardyń arasynda shyǵarmashylyq salasynyń mamandary, áskerı qyzmetkerler, dárigerler, muǵalimder, qurylysshylar, kóp balaly otbasylar, sondaı-aq qoǵamnyń ózge de túrli salalarynda qyzmet etip júrgen tulǵalar boldy, – dedi jeńimpazdardy quttyqtaýǵa kelgen Nur-Sultan qalasy ákiminiń orynbasary Erlan Qanalımov.
Mine, bul talaptarǵa túgel sáıkes kelip, qatarlastarynan oq boıy oza shyqqan Seıitjan Qoıbaqovtar áýleti bıyl qalalyq kezeńniń bas júldesin ıelendi. Bul – Uly Otan soǵysynyń batyry men tyl ardageri, batyr anadan taraǵan áýlet. Qazir áýlettiń otanasy Bakıra Nysanbaıqyzy – 91 jasta. Qosaǵymen 10 bala týyp, ósirip, olardan 32 nemere, 31 shóbere, 5 shópshek súıip otyr. Oǵan qosa bul otbasynan 3 ǵylym doktory, 2 ǵylym kandıdaty, 2 zań qyzmetkeri, 3 medısına mamany shyqqan. Al 7 adamy áskerı qyzmet salasynda eńbek etýde. Olardyń sol kúngi sahnaǵa syıǵan ókilderiniń qushaqtary gúlge tolyp, syı-qurmetke bólendi.
Al baıqaýdyń I orny Dúısenǵazy Qasymulynan taraǵan áýletke berildi. Bul aqyndar áýletiniń eń tanymaly – aıtysker Serikzat Dúısenǵazy bastaǵan top qyzyldy-jasyldy búrmeli kóılek kıgen qyzdarymen-aq aınalany gúldendirip jiberdi. Al tanymal aqyn quttyqtaý rásiminen soń qolyna mıkrofon alyp, ishki qýanyshty bulqynysyn áserli shýmaqqa aınaldyryp, tógip-tógip jiberdi.
Endi bul jeńimpaz otbasylar «Mereıli otbasy» baıqaýynyń respýblıkalyq kezeńinde Nur-Sultan qalasynyń namysyn qorǵaıdy.Konkýrs qorytyndysy boıynsha júldeli ekinshi oryn eki otbasyna – ustazdyǵymen eńbegi sińgen kóp balaly Erkin Dáýeshov pen rýhanı tárbıe nasıhatshysy Azamat Máljanbaı áýletine, al eki úshinshi oryn elordalyq kóp balaly otbasylar Erjan Ospanqulovtar men Baıdilda Qadyrbaevtar áýletine buıyrdy.
Budan bólek, «Talantty otbasy», «Áleýmettik belsendi otbasy» jáne «Sportshy otbasy» atalymdarynyń jeńimpazdary marapattaldy.
Ultty uıystyryp, shańyraqtarǵa shattyq syılaıtyn «Mereıli otbasyna» qatysýǵa nıetti jáne laıyqtylar sany jyl saıyn artyp kele jatqany da baıqaldy. Munyń ózi Elbasy bastamasynyń ult údesinen shyqqandyǵynyń kórinisi bolsa kerek.
Al «Qazmedıa holl» kınokonsert zalynda osy jandardyń qurmetine elimizdiń belgili ánshileri óner kórsetti.