Jastyq shaǵyn Naryn qumyn jaılaǵan Isataı aýdanynda ótkizgen Narıman Úlkenbaıuly Aqqystaý halyq teatrynyń alǵashqy rejısseri boldy. Aýyldyń ónerge jaqyn jastaryn janyna jınap, halyq teatrynyń negizin qalady. Aýyl ónerpazdary 1970 jyly Máskeýde, keıin Iýgoslavııada ótken baıqaýlarǵa qatysyp, Birinshi dúnıejúzilik festıvaldiń júldegeri atandy. Budan basqa da baıraqtary az emes. Shaǵyn aýyldyń sahnasynan bastalǵan óner joly Narıman Úlkenbaıulyn Qazaqstannyń eńbek sińirgen qaıratkeri qurmetti ataǵyna deıin jetkizdi.
Ol bar ómirin Atyraý óńiriniń mádenıetiniń damýyna arnady. Otbasyn quryp, urpaq ósirdi. Qazaqqa Aıgúl Úlkenbaevadaı talantty kúıshi syılady. Shákirt tárbıeledi. Qaı salada júrse de halyqtyń alǵysyna bólendi.
Jaqynda Isataı aýdanyndaǵy Tushyqudyq aýyldyq mádenıet úıine Narıman Úlkenbaıulynyń esimi berildi. Saltanatty sharaǵa qatysqan «Ardagerler qoǵamy» respýblıkalyq uıymy Ortalyq keńesi tóraǵasynyń birinshi orynbasary, qoǵam qaıratkeri О́mirzaq Ozǵanbaıuly: «О́mir boıy elge qyzmet etken azamattyń atyn ardaqtaý – tárbıelik máni bar shara», dep atap ótti.
Al oblys ortalyǵynda Narıman Úlkenbaev atyndaǵy halyq teatrlary men mýzeı mamandarynyń I respýblıkalyq baıqaýy uıymdastyryldy. Segiz atalym boıynsha júldegerlerdi anyqtaǵan óner dodasyna elimizdiń túkpir-túkpirindegi halyq teatrlary arnaıy keldi. «Eń úzdik spektakl» atalymyn Batys Qazaqstan oblysy Qaztalov aýdandyq halyq teatry jeńip aldy. Mýzeı mamandary arasynda ótken baıqaýda Atyraý oblystyq tarıhı-ólketaný mýzeıiniń qyzmetkeri Lázzat Salyqova bas júldege ıe boldy.
Jaqsylarmen joldas bolyp, jaqsylyqty dáriptegen, júrgen jeri jyr-dýman bolǵan ardaqty azamattyń atyn týǵan jeri osylaısha ulyqtap jatyr. Atamekenniń qurmetinen asqan syı bolar ma?
ATYRAÝ