«Apat týraly aqparat jetken alǵashqy kúni-aq Oraldan qurylys materıaldary tıelgen alǵashqy kerýen attanyp ketti» dep habarlady Batys Qazaqstan oblysy ákiminiń baspasóz hatshysy Dáýren Sákenuly.
Aksııa aıasynda kóptegen mekeme-uıymdardyń qyzmetkerleri ózderiniń birkúndik jalaqysy kóleminde qarjylaı kómekti japa shekkenderge aýdarý jóninde sheshim qabyldaǵan. Olardyń aldyńǵy leginde Oral qalasy ákimdiginiń qyzmetkerleri, «Batys Sý Arnasy» JShS-nyń 900 qyzmetkeri bar.
«Biz barlyq turǵyndardy, jastardy, eriktilerdi apatqa ushyraǵan adamdarǵa kómek kórsetýge shaqyramyz. Bizdiń otandastarymyzǵa qoldaý qajet!» deıdi eriktiler.
Dál qazir Oral qalasynda úsh jerde: N.Nazarbaev dańǵyly boıyndaǵy 188 úıdiń birinshi qabatynda, Qadyr Myrza Álı kóshesindegi 18 úıde ornalasqan «Bastaý» kovorkıng ortalyǵynda jáne J.Moldaǵalıev kóshesiniń 19 úıinde arnaıy ortalyq ashylyp, jumys isteýde.
Búgin, 25 maýsym kúni tús aýa Oral qalasynan 30 tonna gýmanıtarlyq júk tıegen taǵy bir kerýen Arysqa qaraı bet aldy. Kómek ishinde 6 tonna un, 2 tonna makaron ónimderi, 2 tonna ósimdik maıy, 5 tonna taýyq eti, balalar kıimderi, t.b. qajetti zattar bar. Bul «Beles-Agro», «Terekti maı kombınaty», «Kúbileı», «Jaıyq et», «Oral transformator zaýyty» sekildi iri kásiporyndar usynǵan alǵashqy kómek.
Batys Qazaqstan