M.Áýezov Ádebıet jáne óner ınstıtýtynyń dırektory, fılologııa ǵylymynyń doktory K.Matyjanov, L.Gýmılev atyndaǵy Eýrazııa Ulttyq ýnıversıteti Túrkitaný kafedrasynyń professory, fılologııa ǵylymynyń doktory Sh.Ybyraev, Qazaq ulttyq qyzdar pedagogıkalyq ýnıversıteti Mýzykalyq bilim berýdiń teorııasy men ádistemesi kafedrasynyń meńgerýshisi, fılologııa ǵ.d., professor T.Qońyratbaev, M.O.Áýezov atyndaǵy ádebıet jáne óner ınstıtýtynyń bas ǵylymı qyzmetkeri, fılol.ǵ.d., professor B.Ázibaeva, Nur-Múbárák ýnıversıtetiniń professory, fılol.ǵ.d. Sh.Kerim, Qyrǵyz-qazaq ýnıversıtetiniń rektory, fılol.ǵ.k., professor A.Buldybaı, M.O. Áýezov atyndaǵy Ádebıet jáne óner ınstıtýty, «Qoljazba jáne tekstologııa» ǵylymı-ınnovasııa bóliminiń meńgerýshisi, fılol.ǵ.k. T.Álbekov jáne t.b. folklortanýshy ǵalymdar qatysty. Is-shara barysynda ǵalymdar men mamandar «Dala folklorynyń antologııasy» on tomdyǵynyń 2019 jyly jaryq kóretin alǵashqy 5 tomynyń mazmunyna, qurylymyna, baspaǵa daıyndalý júıesine baılanysty usynys, pikirlerimen bólisti.
M.Áýezov Ádebıet jáne óner ınstıtýtynyń dırektory, fılologııa ǵylymynyń doktory Kenjehan Matyjanovtyń aıtýynsha, ulttyq epostyń tańdaýly úlgilerin qamtıtyn tomdardyń ataýy, ıaǵnı túrli úlgide paıdalanylyp kelgen eposqa qatysty termınderdi birizdilikke keltirý máselesi qozǵalyp, folklortanýshy ǵalymdardyń pikirleri tyńdaldy. Talqylaý barysynda árqıly oı-tujymdar aıtyldy. Nátıjesinde antologııanyń birinshi jáne ekinshi tomdary batyrlar jyryna arnalyp, alǵashqy tomǵa kóne epos pen batyrlyq epos, al ekinshi tomyna «Qyrymnyń qyryq batyry» toptamasy enedi. Ǵalymdar úshinshi tomǵa tarıhı jyrlardy, al tórtinshi tomǵa ǵashyqtyq jyrlar, besinshi tomǵa dastandardy engizýdi jón sanady.
Antologııalyq júıede basylym kóretin kitaptardyń formaty, kórkemdelýi álem jurtshylyǵy rýhanııatynyń ortasynan ózindik ornyn ılenetin qazirgi zamanǵa saı ozyq úlgide shyǵarý máselesi de ǵalymdardyń nazarynda boldy. Jınaqtardyń pishimi, muqabasynyń ulttyq naqyshta bezendirilýi, ishki betteriniń, mátinderdiń aıshyqtalýy, ár tomǵa engiziletin sýretterdiń, ıllıýstrasııalardyń mańyzy oı eleginen ótkizilip, baspaǵa daıyndaý barysynda ulttyq rýhanııattan mol habary bar, tájirıbeli, bilikti-isker dızaıner-baspager, sýretshi, halyq mýzykasyn tereń túsinetin zertteýshi, t.b. mamandardy tartyp, shyǵarmashylyq birlikte jumys isteý qajettiligi sóz boldy. Tomdarǵa enetin epostyq mátinderdiń máselesi de ózekti. Jyr mátinderin elimizdiń sırek qorlarynyń, sondaı-aq buryn jarııalanǵan jınaqtardyń, alys-jaqyn shetelderde turatyn qazaq etnostarynyń muralarynyń negizinde izdestirý, olardyń túrli nusqalary men jarııalanymdaryn bir-birimen tekstologııalyq turǵyda salǵastyrý arqyly tili kórkem, sıýjetteri tolyq, mazmunǵa baı, jyrlaýǵa, halyq mýzykasymen súıemeldeýge yńǵaıly ozyq úlgileri tańdalýǵa tıis.
Jınaqtarǵa beriletin qosymshalarǵa da asa mán berildi. Atap aıtqanda, mátinderde kezdesetin kónergen, kirme, kónetúrki t.b. jalpy oqyrmandarǵa túsiniksiz sózderdiń, etnografııalyq uǵymdardyń sózdikteri, jer-sý ataýlary, ǵylymı túsinikter, notalar, bıblıografııalyq kórsetkishter, tomdardyń orys, aǵylshyn tilderindegi túıindemeleri t.b. jeke-jeke talqylanyp, tushymdy oı-pikirler aıtyldy.
Ǵalymdar jınaqtarǵa engen jyrlardyń aýdıonusqasyna da kóńil bólindi. Eń aldymen, joǵary deńgeıde qalyptasqan, respýblıka, alys-jaqyn shetelderde tanylǵan, bedeldi, dástúrli halyq mýzykasyn, án-jyryn túsirýge qaýqarly, zamanǵa laıyq mýzykalyq, elektrondy qondyrǵylarmen jabdyqtalǵan, bilikti mamandarmen (prodıýser, mýzyka rejıssery, halyq mýzykatanýshysy t.b.) qamtylǵan aýdıojazý stýdııasy bar kompanııalarmen kelissózderde júrgizilip, olardyń tańdaýlysymen shart jasalyp, jumys josparly belgilenýge tıis. Jumys barysynda Qurmanǵazy atyndaǵy Ulttyq konservatorııanyń dástúrli halyq mýzykasy kafedrasynyń, T.Júrgenov atyndaǵy О́ner akademııasynyń dástúrli óner fakýltetiniń ustaz-oqytýshylarymen, túrli óner oshaqtaryndaǵy ánshi-jyrshylarmen baılanys jasalyp, kelisimder júrgizilip, jyrshy-oryndaýshy jetispegen jaǵdaıda óńirlerden arnaıy shaqyrtý qajettigi aıtyldy. Olardy irikteýde jyrshylardyń oryndaýshylyǵynan ózge mýzykashy retindegi qabiletteri de nazarǵa alynatyn bolady (qobyzshylyǵy, dombyrashylyǵy, syrnaıshylyǵy, jetigenshiligi t.b.).
Bestomdyq antologııanyń kitabı, elektrondy, aýdıo nusqalary qatar oryndalady. Daıyndalǵan ónim ınstıtýttyń arnaıy saıtyna júkteledi jáne onyń jeke kody tomda kórsetiledi. Bul silteme kitaptyń aýdıonusqasyn kompıýter, planshet, qalta telefon (smartfon) arqyly paıdalanýǵa, júktep alýǵa múmkindik týdyrady.
Bul is-shara qajyrly eńbekti, mol ýaqytty jáne ony bilikti mamannyń qadaǵalap otyrýyn talap etedi. Sondyqtan bul jumystarǵa baǵyt-baǵdar berip, ár salanyń sapasyn qadaǵalaý úshin arnaıy sarapshylar, kórkemdik keńester bekitilip, istelgen jumystarǵa qatysty ǵylymı pikirler, hattamalar jazylǵan jón degen túıindi qorytyndyǵa keldi folklortanýshy ǵalymdar. Ǵylymı jıynnyń nátıjesinde jınaqtarǵa engiziletin epostyq jyrlardyń tizimi, naqty nusqalary anyqtaldy. Alǵashqy bes tom boıynsha ǵylymı sarapshylarǵa usynylǵan jyr mátinderine naqty ǵylymı saraptama-pikirler alyndy. Jınaqtardy baspaǵa ázirleý barysynda korrektorlyq, redaktorlyq jumystar qamtylyp, saýatty ári sapaly daıyndalýyna jaǵdaılar jasalady.
Jınaq 10000 danamen shyǵarylyp, Qazaqstannyń barlyq JOO men kitaphanalaryna taratylatyn bolady.