Turmysy tómen otbasylarǵa arnap salynǵan 50 páterdi oblys ákimdigi qolǵa alsa, 100 páterdi osy óńirdiń týmasy, mesenat Bolat О́temuratovtyń qaıyrymdylyq qory kóterip aldy.
Syr óńirine jumys saparymen kelgen Nur Otan partııasy depýtattyq fraksııasynyń músheleri, Májilis depýtattary Abzal Eralıev, Balaıym Kesebaeva, Baıdildá Jylqyshıev, Taras Hıtýov «Balameken» jobasy aıasynda salynǵan turǵyn úıler qurylysymen tanysyp, turǵyndarmen júzdesti.
Olar mejelengen 100 otbasyna arnalǵan qos páterli úıdiń 50-ine qonystanǵan turǵyndarmen kezdesti. Halyq qalaýlylaryna osy úıden baspana alǵan kóp balaly ana Izimkúl Tursanova barlyq analar atynan rahmetin aıtty.
– Buǵan deıin páter jaldap qınalyp júrgenbiz. «Balameken» jobasynyń nátıjesinde mine, baspanaly bolyp otyrmyz. Kóship kelgenimizge bir aı boldy. Munda jaryq, sý, gaz, jol, telefon baılanysy bar, barlyq jaǵdaı jasalǵan. Elimizge osyndaı qamqorlyq kórsetip jatqanyna alǵys aıtamyn, – dedi Izimkúl Tursanova.
Elbasynyń halyqty áleýmettik qoldaý baǵytyndaǵy tapsyrmasynyń nátıjeli júzege asyrylýyna kóz jetkizgen Májilis depýtattary da joba aıasyndaǵy jumystarǵa oń baǵasyn berdi.
«Balameken» jobasy halyq qalaýlylaryn da tánti etti. Májilis depýtaty Balaıym Kesebaeva kóp balaly analarǵa arnalǵan osyndaı tıimdi ári yńǵaıly jobany tek Syr óńirinen kórgendigin aıtyp, osynaý iske muryndyq bolǵan el aǵalaryna rahmetin jetkizdi.
Halyqpen kezdesý barysynda Parlament depýtattarymen birge bolǵan Nur Otan partııasy Qyzylorda qalalyq fılıaly tóraǵasynyń birinshi orynbasary Shárip Ábdirahmanov oblystaǵy turǵyn úıge baılanysty jasalyp jatqan jumystardy aıtyp ótti.
– Turǵyn úı qurylysyn damytý maqsatynda sońǵy 6 jyl ishinde Qyzylorda qalasynyń ózinde 15 shaǵyn aýdan paıda bolǵan. Jańa aýdandardyń qurylysy da júrip jatyr. 2019 jyldyń sońyna qaraı Syrdyń sol jaǵalaýynda 2 628 páterlik 13 kópqabatty turǵyn úı salynyp, oǵan 13 myń adamdy qonystandyrý kózdelip otyr. Elbasynyń 2018 jyldyń qańtaryndaǵy Joldaýyna oraı, bolashaqta bir adamdy 30 sharshy metr baspanamen qamtamasyz etý máseleleri de josparda bar, – dedi ol.
Qyzylorda oblysy