«QazMunaıGaz» UK» AQ basqarma tóraǵasynyń orynbasary, «Kazakhstan Petrochemical Industries Inc» JShS basqarma tóraǵasy Danııar Tıesovtiń aıtýynsha, keshen jumysy bastalǵan alǵashqy kezeńde jylyna 500 myń tonna polıpropılen óndiriledi. Qazir qurylys jumystary qarqyndy júrip jatyr. Buǵan deıin jobany júzege asyrý kórsetkishi 6 paıyz ǵana bolǵan edi, jańa menedjment júıesi engizilgennen keıin 34 paıyzǵa kóterildi. Aıta ketý kerek, bul – «Samuryq-Qazynanyń» otandyq kompanııa kúshimen júzege asyryp jatqan alǵashqy jobasy.
Qazir nysanda 2 myńnan astam adam jumys isteıdi. Jobada qazaqstandyq qamtýǵa basymdyq berilgen. KRI atqarýshy dırektory Damır Áshimov: «Jumysshylardyń túgelge jýyǵy qazaqstandyq mamandar, – deıdi. – Otandyq kásiporyndardyń jumys sapasy sheteldik kompanııalardan kem túspeıtinin ýaqyt kórsetip otyr. Mysaly, qurylysqa qajet eń úlken qurylǵy – kolonnany «AtyraýMunaıMash» zaýyty daıyndaýda. Mundaı úlken qurylǵy buryn-sońdy bizdiń elimizde jasalǵan emes».
Jospar boıynsha qurylys jumystary 2021 jyly aıaqtalady. Joba sátti júzege assa, 50-den astam jańa ónim shyǵarylady. Elimizdegi tuńǵysh munaı-hımııa kesheni shaǵyn jáne orta bıznesti damytýǵa da tyń serpin bermek.
ATYRAÝ