Elordanyń temir jol vokzalynan «Týǵan elge saıahat» balalar týrıstik poıyz» jobasynyń úshinshi maýsymynyń qatysýshylary saparǵa attandy. Toǵyz kúndik tamasha saıahatqa attanbas buryn balalar elordanyń kórikti jerlerimen serýendep, qalanyń sáýlet ónerin tamashalap, «EKSPO-2017» kórmesine ekskýrsııa jasady.
Jobanyń ótken eki saparyndaǵy qatysýshylar sııaqty osy joly da balalardyń kóbi elordaǵa alǵash ret kelip turǵandaryn atap ótken jón. Balalar barlyǵy birinshi kúnnen-aq alǵan áserlerimen bólisýde. Baltóbe Tohtamurat, Monǵolııadan kelgen 12 jasar qatysýshy: «Biz búgin EKSPO keshenine bardyq, Báıterek monýmentin tamashaladyq. Bul meniń Nur-Sultan qalasyna ekinshi ret kelýim, biraq men kelgen saıyn ózime jańalyq ashamyn. Maǵan bárinen buryn balalarmen tanysqan, sonymen qatar, bizdiń úlken eki qabatty avtobýsta serýendegenimiz qatty unady. Men Qazaqstannyń basqa qalalarynda bolǵan emespin, biraq bárinen buryn Baıqońyr qalasyn kórgim keledi, óıtkeni onda ǵarysh aılaǵy bar jáne kóptegen tarıhı eskertkishterge toly Túrkistan qalasyn kórgim keledi»
Jobanyń ár qatysýshysy aldaǵy saıahattan kóptegen qyzyqty dúnıelerdi kútip, óz eliniń kórikti jerlerin baǵyndyrýǵa daıyn. Aqtóbe oblysy, Shalqardan kelgen Janbolatova Aqbota óziniń bul jobaǵa qalaı kelgenin aıtyp berdi: «Men joba týraly ınstagram áleýmettik jelisinen bilip, shyǵarma jazyp, beınerolık túsirip joldadym. Biz anamyz ekeýimiz baıqaý nátıjelerin qatty kúttik, al jeńgenimdi bilgende óte qatty qýandym. Men Qazaqstandy jaqsy kóremin, bul saıahatty sol sebepti asyǵa kúttim. Men elimizdiń kóptegen kórikti jerlerin aralaıtynymyzdy bilemin, ásirese taýlardy qatty kórim keledi. Qatysýshylar óte kóppiz, bizge birge kóńil kótergen qyzyq, túrli qalalardan jańa dostar tapqanyma óte qýanyshtymyn. Meniń oıymsha bul saparymyz qyzyqqa toly bolady. Biz tipti osy ýaqyt ishinde bı úırenip úlgerdik. Tárbıeshilerimizdi qatty jaqsy kórip kettim, olarmen bı bılep, sýret salamyz, oıyn oınaımyz. Ári qaraı ne bolatyny óte qyzyq».
Poıyzda balalarmen birge tárbıeshiler men jattyqtyrýshylar bolady, olar kún saıyn balalarǵa arnalǵan oıyn-saýyqtyq jáne sporttyq trenıngter ótkizedi. Osyndaı qanyq baǵdarlamamen qamtylǵan poıyz qaladan qalaǵa jolǵa shyǵyp otyrady. Balalar týrıstik poıyzynyń baǵdarlamasyna Nur-Sultan, Taraz, Balqash, Baıqońyr jáne Almaty sııaqty qalalardy aralaý kiredi.
Tárbıeshi-horeograf О́mirbekov Marat aldaǵy úshinshi maýsymnan kútetin boljamdarymen bólisti: «Minekeı biz sońǵy úshinshi sapardy da bastaǵaly jatyrmyz. Shynymdy aıtsam, joba aıaqtalǵaly jatqany sál ókinishti de. О́tken eki sapar óte keremet boldy. Úshinshi sapar odan da qyzyqty bolady dep kútilýde. Biz balalarǵa qyzyqty baǵdarlama, fleshmob jáne shýmaqty urandar daıyndadyq. Ár otrıadtyń ózindik ereksheligi bar: bireý án aıtsa, bireý óleń oqıdy, endi bireý sýret jaqsy salady. Osylaısha sapar barysynda balalardyń bir-birine talanttary men ónerlerin kórsetýge jaǵdaı jasaýǵa tyrysamyz. Men osy maýsymda kóptegen balalardyń shalǵaı eldi-mekenderden elordaǵa alǵash kelgenderin baıqadym, olardyń kóterińki kóńilderi men jarqyn emosııalary osyǵan da baılanysty dep oılaımyn. Altaıdan, Monǵolııadan jáne Belorýsııadan kelgen qatysýshylardyń óz qurdastarymen ana tilinde erkin sóıleýleri bizdi qatty tańqaldyrdy».
Poıyz Nur-Cultan qalasyna 9 tamyz oralatyn bolady. Jalpy «Týǵan elge saıahat» balalar týrıstik poıyz» jobasy Qazaqstannyń túkpir-túkpiri men shetelden kelgen 600 balaǵa elimizdiń eń kórikti jerlerin aralap, tamashalaý múmkindigin beredi.
Jazdyń basynan bastap balalar týrıstik poıyzy óziniń eki saparyn aıaqtady, onda Qazaqstannyń túkpir-túkpirinen 400 bala jáne kórshi elderdegi qazaq dıasporasynyń balalary elimizdiń eń kórikti jerlerin kórip, jańa oqý jylyna keremet áserlermen qanyqty.
Esterińizge sala ketsek, 1 maýsym Halyqaralyq balalardy qorǵaý kúni «Týǵan elge saıahat» balalar týrıstik poıyzy» jobasynyń alǵashqy maýsymy bastalǵan bolatyn. 1 shilde joba aıasyndaǵy ekinshi maýsym bastaldy. Barlyǵy 2019 jyldyń jaz aıyna úsh sapar josparlanǵan – sońǵy saıahat 1 tamyz bastalady. Joba balalardyń jan-jaqty damýyna, qorshaǵan álemge qyzyǵýshylyǵyn arttyrýǵa, eldiń tarıhı jáne sáýlet eskertkishterimen tanysyp, patrıotızmdi nyǵaıtýǵa baǵyttalǵan. Jalpy 2019 jylǵy maýsymnyń joba qatysýshylary 600 balany quraıdy: «Samuryq-Qazyna» AQ shalǵaı óńirlerde ornalasqan, kópbalaly jáne tolyq emes otbasynda tárbıelenip jatqan, oqý úlgerimi jaqsy óndiristik kásiporyndary men zaýyt jumysshylarynyń 500 balasy, «Otandastar qory» KeAQ-men seriktestik negizinde shet memleketterden kelgen qazaq dıasporasynyń ókilderinen 50 bala jáne shyǵarmashylyq baıqaý qorytyndysy boıynsha Qazaqstan boıynsha anyqtalǵan jeńimpaz 50 bala kiredi.
Jobany «Qazaqstan Temir Joly» UQ» AQ janyndaǵy Áleýmettik jobalar qory «Samruk-Kazyna Trust» áleýmettik jobalardy damytý Qorymen birge júzege asyryp jatyr