Memleket basshysy Qasym-Jomart Toqaevtyń tapsyrmasy boıynsha Ishki ister mınıstri Erlan Turǵymbaev Almaty oblysynyń Zarechnyı kentinde ornalasqan LA-155/8 kolonııasy qyzmetiniń uıymdastyrylýyn tekserdi. Buǵan deıin atalǵan kolonııada jazasyn óteýshilerdi uryp-soǵý sáti beınelengen jazbalar ınternet jelisinde taralyp, úlken shý týǵyzǵany belgili.
Kolonııaǵa Ishki ister mınıstrimen birge «Adam quqyǵyn qorǵaý hartııasy» qoǵamdyq qorynyń atqarýshy dırektory Jemis Turmaǵambetova, Halyqaralyq túrme reformasy Ortalyq Azııadaǵy ókildigi dırektorynyń orynbasary Janna Nazarova, ulttyq preventıvtik mehanızmniń múshesi Igor Mıroshnıchenko jáne jýrnalıst Tohnııaz Kýchýkov, zań ǵylymdarynyń doktory, penıtensıarıst Aıdarhan Sqaqov, IIM Qoǵamdyq keńesiniń múshesi Rústem Haıdarovtar bardy. Olar sottalǵandar ustalatyn otrıadtar men kameralardy aralap, jazasyn óteýshilerdiń turmystyq jaǵdaılarymen tanysty. Sondaı-aq medısınalyq-sanıtarlyq kómek kórsetý, tamaqtandyrýdy uıymdastyrý jáne eńbekpen qamtý máselelerin qadaǵalady.
Búginde atalǵan kolonııada 737 sottalǵan bar. Onyń ishinde eńbekke jaramdy 426 adamnyń 243-i jumysqa ornalastyrylǵan.
Kolonııa aýmaǵynda shaǵyn jáne orta bıznestiń 7 nysany jumys isteıdi, onda 119 jazasyn óteýshi metall qurylymdaryn, shlakty bloktar daıyndaýmen jáne tigin tigýmen aınalysady.
Mınıstr mekeme aýmaǵyndaǵy jalpy bilim beretin mektepti jáne kásiptik-tehnıkalyq kolledjdi aralap kórip, bilim berý úderisin uıymdastyrý sapasyna kóńil aýdardy. Resmı delegasııa ókilderine oqytylatyn mamandyqtar tizimi kórsetilip, oqý ornynyń materıaldyq-tehnıkalyq jabdyqtalý jaǵdaıy tanystyryldy.
Osy jaǵdaılardy kózimen kórgen Almaty oblysynyń qoǵamdyq baqylaý komıssııasynyń ókili Igor Mıroshnıchenko mınıstrlik tarapynan bas bostandyǵynan aıyrý oryndaryndaǵy jumyspen qamtý uıymdary jáne azamattyq qoǵammen ózara dıalogty nyǵaıtýdaǵy oń úrdisterdi atap ótti.
– IIM oń úrdiske bet burdy. Jumys nátıjeleri baıqalady, barlyq tótenshe jaǵdaı faktileri boıynsha dereý sharalar qabyldanady. Azamattyq qoǵamnyń jumysy úshin eshqandaı kedergi joq, – dedi I.Mıroshnıchenko. Sondaı-aq azamattyq qoǵamdastyqtyń ókili túzeý mekemelerin jańǵyrtý boıynsha birqatar usynystaryn jetkizdi.
E.Turǵymbaev azamattyq qoǵam ókilderimen birge sottalǵandardyń jeke máseleleri boıynsha qabyldaý ótkizdi. Qabyldaý barysynda negizinen ustaý rejimi, qylmystyq ister, turǵylyqty jeri boıynsha aýystyrý jáne qujattandyrý máseleleri boıynsha 37 adam júgindi.
Sottalǵandardy qabyldaǵannan keıin Ishki ister mınıstri azamattyq qoǵam ókilderimen birge kelip túsken usynys-tilekterdiń barlyǵyn talqylap, bas bostandyǵynan aıyrý oryndaryndaǵy sottalǵandardyń jaǵdaıyn jaqsartýdy ońtaılandyrý boıynsha birqatar zań aktilerine ózgerister engizýge qatysty usynystardy qaraý týraly sheshim qabyldady.
Budan soń vedomstvo basshysy Almaty oblysynyń QAJD jeke quramymen jumys keńesin ótkizdi. Keńeste kolonııa qyzmetkerleriniń jazalardy oryndaý salasyndaǵy zańnamalardy jáne sottalǵandardyń quqyqtaryn múltiksiz saqtaýyna basa nazar aýdardy, sondaı-aq mekemede bolǵan tótenshe jaǵdaıdy tekserý nátıjelerin qarady.