Abaı atyndaǵy Qazaq ulttyq pedagogıkalyq ýnıversıtetinde GMAT formatyndaǵy, ıaǵnı magıstratýranyń bilim berý baǵdarlamalaryna keshendi testileýdiń tanystyrylymy ótti.
Is-sharaǵa ýnıversıtet rektory Takır Balyqbaev, Sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń bastyǵy Qaırat Súntaev, onyń birinshi orynbasary Danııar Taýmurat, Arnaıy monıtorıngtik toptyń músheleri, Qazaqstan Respýblıkasy Bilim jáne ǵylym mınıstrliginiń jáne Ulttyq testileý ortalyǵynyń ókilderi, ýnıversıtet basshylyǵy men qabyldaý komıssııasynyń qyzmetkerleri qatysty.
Emtıhan aldyndaǵy testileýdiń ashyqtyǵyn jáne testileý normalarynyń buzylmaýyn qamtamasyz etý maqsatynda rektor Takır Balyqbaev Almaty qalasy boıynsha sybaılas jemqorlyqqa qarsy kúres qyzmeti ókilderin, Arnaıy monıtorıngtik toptyń múshelerin QR Bilim jáne ǵylym mınıstrligi komıssııasynyń quramymen, testileý jáne komıssııa quramynyń jumysymen tanystyryp, aýdıtorııalarda ornatylǵan beınebaqylaýǵa arnalǵan tehnıkalyq quraldardy usyndy.
Testileý barysyn ashqan Abaı atyndaǵy QazUPÝ-dyń oqý isi jónindegi prorektory Asan Satmyrzaev barlyq talapkerlerdi testileý erejelerine engizilgen ózgerister týraly habardar etip, GMAT (Graduate Management Admission Test) formaty týraly aqparat berdi, sonymen qatar emtıhan tapsyrýshylarǵa sáttilik tiledi.
Bıyl alǵash ret GMAT formatyndaǵy testileý úderisin Bilim jáne ǵylym mınıstrliginiń komıssııasymen jáne Ulttyq testileý ortalyǵymen birge Arnaıy monıtorıngtik toptyń músheleri baqylaıtyn bolady. Úmitkerlerdiń ata-analary keshendi testileý barysyn onlaın rejıminde oqý ǵımaratynyń syrtynda ornatylǵan ekrandar arqyly baqylaı alady. Sonymen qatar, aýdıtorııalarda talapkerlerge yńǵaıly bolý úshin barlyq jaǵdaı jasalǵan.
Testileý kezinde joǵary ball jınaǵan talapkerler grantqa ıe bolady jáne oqý úshin ýnıversıtetti ózderi tańdaıdy. Bilim salasyndaǵy bul bastama memlekettik grant oryndaryn tabystaý úderisiniń ashyqtyǵy men aıqyndylyǵyn, sonymen qatar ýnıversıtetterdiń básekege qabilettiligin arttyrady.
ALMATY