Áskerı qyzmetshiler jaqsy nátıjelerdi kórsete otyra, serjanttar korpýsynyń jaýyngerlik daıarlyq júıesindegi mańyzdylyǵyn taǵy bir dáleldedi, deıdi «Batys» óńirlik qolbasshylyǵy Basqarmasynyń baspasóz qyzmetinen kapıtan Rýstem Igısınov.
Atalmysh konkýrs Aqtaý qalasynyń 25744 áskerı bóliminiń bazasynda ótti. Bes kún ishinde óńirlik qolbasshylyqtyń eń myqty serjanttary saıysqa túsip, «Úzdik batalon serjanty», «Úzdik rota serjanty», «Úzdik vzvod serjanty» jáne « Úzdik bólimshe serjanty» nomınasııalarynda baq synasty.
Konkýrs baǵdarlamasy «Qaısar» áskerı-sport saıysy, «Barys» áskerı qoıan-qoltyq kúresi, oq daıyndyǵynan «Mergen» etapy, áskerı tehnıkany júrgizýden «Tulpar», bilimdiler arasynan «Bilimpaz» etapy, «Sheber» tehnıkalyq daıyndyq taqyryby, «Densaýlyq» áskerı-medısınalyq daıyndyǵy men «Baǵdar» áskerı topografııa taqyryptarynan quraldy.
Konkýrs nátıjesi boıynsha «Úzdik batalon serjanty» ataǵyn 30238 áskerı bóliminen (Aqtobe) 3 synypty serjant Azamat Askarov ıelendi. «Úzdik rota serjanty» ataǵy 41433 áskerı bóliminiń áskerı qyzmetshisi (Atyraý) aǵa serjant Ermek Zaılagıǵa buıyrsa, 75488 áskerı bóliminen (Aqtaýa) serjant Mereı Daýrenbekov «Úzdik vzvod serjanty», al 41433 áskerı bóliminen (Atyraý) kishi serjant Temırlan Baızýllın «Úzdik bólimshe serjanty» nomınasııalarynda jeńimpaz atandy.
- Biz jyl saıyn osy konkýrstyń deńgeıi men serjanttardyń kórsetkishterin jaqsartýǵa barymyzdy salamyz kelemiz. Búgingi kúni, serjant korpýsy «men sııaqty jasa, menen de jaqsy jasa» uranymen jeke quramdy alǵa jetelep, óńirlik qolbasshylyqtyń qýatyn arttyrýǵa óz septigin tıgizip keledi, deıdi 30238 áskerı bóliminiń serjanty - 2 synypty serjant Mádı Ahmetjanov.
Konkýrs sońynda jeńimpazdar baǵaly syılyqtarmen jáne gramotalarmen marapattaldy. Sonymen qosa, ár taqyryptaǵy úzdik serjanttarda nazardan tys qalmady.
Búgingi kúni «Batys» óńirlik qolbasshylyǵy serjanttar quramy, jeke quramnyń jaýyngerlik jáne dene daıarlyǵyndaǵy, joǵary áskerı tártipti ustaýdaǵy, kúndelikti áskerı qyzmet úrdisin qadaǵalaýdaǵy alatyn oryndary zor.
Mańǵystaý oblysy