«QazMunaıGaz» UK AQ Basqarma Tóraǵasy Alık Aıdarbaev Mańǵystaý oblysynyń munaıshylaryn kásibı merekemen jáne qazaq munaıynyń 120 jyldyq mereıtoıymen quttyqtady. Saltanatty is-sharalar 2019 jyldyń 30-31 tamyzynda Jańaózen jáne Aqtaý qalalarynda ótti.
-Táýelsizdik alǵaly beri munaı-gaz salasy jańa kezeńge qadam basyp, óndiris órge órledi. Salany aıaqqa turǵyzyp, ilgeri damytýda Tuńǵysh Prezıdenttiń orny bólek. Elbasynyń qajyrly eńbegi men saıası jigeriniń arqasynda eńsemizdi tik kóterip, talaı bıikterdi baǵyndyrdyq. Byltyr Qazaqstanda 90 mıllıon tonna munaı óndirildi. Jıyrma segiz jylda «qara altyndy» óndirý kólemi 3-ten asa esege ulǵaıdy. Búgingi tańda elimiz munaı men gaz óndirisi boıynsha dúnıejúzinde 13-shi orynda tur. Eń bastysy – munaıshylardyń ál-aýqaty jaqsardy. О́tken jyldar men búgingi kúnniń áleýmettik-eńbek jaǵdaıyn múldem salystyrýǵa bolmaıdy, dedi óz sózinde Alık Aıdarbaev.
Munaı-gaz kesheni qyzmetkerleriniń kúni jyl saıyn qyrkúıek aıynyń alǵashqy jeksenbisinde atap ótiledi. Kásibı mereke prezıdenttiń jarlyǵymen 2003 jyly bekitilgen bolatyn.
Bıyl qazaqstandyq munaıshylar úshin erekshe jyl. Munaı-gaz salasy 120 jyldyq mereıtoıyn atap ótýde. Esterińizge salaıyq, 1899 jyly Atyraý oblysyndaǵy Qarashúńgil ken ornynda alǵashqy munaı burqaǵy atqylady. Otandyq munaı-gaz salasynyń tarıhy sol sátten bastaý alady.