Dástúrli «Mektepke jol» respýblıkalyq aksııasyna Qaraǵandy oblysy belsendi túrde at salysty. Ásirese Jezqazǵandaǵy Utaria LTD kompanııasynyń osy baǵyttaǵy qaıyrymdylyq isterin erekshe atap ótýge bolady.
Qaraǵandy oblystyq Qazaqstan halqy Assambleıasynyń «Qaıyrymgerler men tálimgerler klýbynyń» ókili jáne «Jomart júrek» tósbelgisiniń ıegeri Sáýle Shaýenova jetekshilik etetin bul kompanııa 67 kópbalaly otbasyna balalaryn mektepke daıarlaý úshin 6 mln teńgege jýyq qarjylaı kómek kórsetti. Ár balaǵa 25 myń teńgeden bólip, olarǵa aıtyp jetkizgisiz qýanysh syılady.
– Eger Qazaqstannyń árbir turǵyny az qamtylǵan otbasylardyń balalaryna jetkilikti túrde kóńil bóletin bolsa, onda mektepke baratyn balalar sany artyp, bilim berý deńgeıi de óse túser edi. Al munyń ózi bolashaq urpaqty damytýǵa ıgi yqpalyn tıgizedi, – deıdi Sáýle Shaýenova.
Utaria LTD kompanııasy men onyń basshysy Jezqazǵanda ǵana emes, respýblıka boıynsha tanymal. Kompanııa metallýrgııa, taý-ken óndirisi, munaı-gaz jáne hımııa salalarynyń jumysshylaryna arnap 500-ge jýyq kıim túrlerin shyǵarady. Sonymen qatar kásiporyn balalarǵa, erler men áıelderge arnalǵan kıim de tigedi. Kásiporyn ónimine degen suranys óte joǵary.
Kompanııanyń qoldaýymen Jezqazǵan qalasynda «Rýhanı jaǵyrý» baǵdarlamasy aıasynda «Týǵan jer» jobasy boıynsha «Bilim jáne damý ortalyǵy» ashylǵan, onda IT-synyby jumys isteıdi. Bilim mekemesiniń Nur Otan partııasynyń «Balalarǵa arnalǵan tegin IT-synyptar» baǵdarlamasy aıasynda qurylǵanyn da aıta ketken lázim.
Budan bólek, kompanııa múmkindigi shekteýli jandarǵa, áleýmettik áljýaz top sanatyna jatatyn turǵyndarǵa da udaıy qamqorlyq jasap keledi. Mysaly kásiporyn olarǵa jáne «Utaria LTD óndiristik kompanııasy» JShS-niń jas mamandary men zeınetkerlerge arnap barlyq turmystyq jaǵdaıy jasalǵan zamanaýı jataqhana salyp berdi.
Atalǵan aksııadan Sátbaev qalasynda tigin jáne toqyma sheberhanasyn qurǵan kásipker, kópbalaly ana Alena Eberman da tys qalmady. Kásipker áıel 30 balaǵa 300 myń teńgeniń mektep kıimin tegin usyndy.
Jalpy «Qaıyrymdylyq kerýeni» qaıyrymdylyq aksııalarynyń kúntizbesi aıasynda osy jyldyń birinshi jartyjyldyǵynda Assambleıa 1,7 myńnan astam is-shara ótkizip, 45 myń adamǵa járdem berdi. Onyń ishinde 10 myńnan astam otbasyna 187 mln teńge kóleminde kómek kórsetilgen. Tek maýsym aıynda jastar men balalardy qoldaýǵa jáne olarǵa kómek kórsetýge baǵyttalǵan «Jylý» aılyǵy aıasynda 18 mln teńgeniń materıaldyq kómegi bólindi.
Qaraǵandy oblystyq Qazaqstan halqy Assambleıasy Arys qalasynda jarylystan zardap shekken jerlesterimizge alǵashqylardyń biri bolyp kómek qolyn sozdy. Etnomádenı birlestikter, oblystyń QHA qurylymdary turǵyndarǵa qaıyrymdylyq kómek kórsetý boıynsha birlesken jumystar uıymdastyrdy. Sonyń nátıjesinde jalpy somasy 5,7 mln teńge bolatyn demeýshilik kómek kórsetildi.
Qaraǵandy oblysy