Kaspıı teńiziniń qazaqstandyq shekarasyn kúzetetin kemeler qatary jańa kememen tolyqty. Aqtaý qalasyndaǵy teńiz portynda UQK Shekara qyzmetiniń ekıpajyna «Nur-Sultan» kemesin jáne kemeniń áskerı-teńiz týyn tabystaý rásimi ótti. Saltanatty sharaǵa Ulttyq qaýipsizdik komıtetiniń tóraǵasy K. Másimov, UQK tóraǵasynyń orynbasary – Shekara qyzmetiniń dırektory jáne óńirlik Jaǵalaý kúzeti, «Batys» óńirlik basqarmasynyń jeke quramy jáne Mańǵystaý oblysynyń ákimi S.Trumov qatysty.
Ulttyq qaýipsizdik komıtetiniń tóraǵasy K.Másimovke UQK Shekara qyzmetiniń Jaǵalaý kúzeti óńirlik basqarmasynyń bastyǵy Á.Kaıýpov áskerı sheptiń daıyndyǵy jóninde baıandady. K.Másimov shekara qyzmeti óńirlik Jaǵalaý kúzeti basqarmasynyń shekarashylaryn ulttyq qaýipsizdikti qamtamasyz etýde olardyń úlesteriniń zor ekendigin atap ótti.
Shekara qyzmetiniń shekarashy jaýyngerleri zańǵa saı teńizdegi tártipti qadaǵalap, memleket qaýipsizdigine qol suǵylmaýyn qamtamasyz etip keledi. Olardy qıyn qyzmetke qajetti zamanaýı qural-jabdyqtarmen qamtý kún tártibinen túsken emes.
«Nur-Sultan» kemesi 206 borttyq nómirli joba, 2018 jyly Prezıdent Jarlyǵymen jasalǵan. Zamanaýı gıdroakýstıkalyq júıemen jabdyqtalǵan keme tek memlekettik shekara – Kaspıı teńiziniń ústin ǵana emes, sonymen qatar munaı-gaz keshenderiniń qaýipsizdigin de senimdi túrde qamtamasyz ete alady.
– El Prezıdenti, Qarýly Kúshterdiń Bas Qolbasshysy Qasym-Jomart Toqaev óziniń 2 qyrkúıektegi Qazaqstan halqyna Joldaýynda «Otanyna adal, kásibı turǵydan daıyndalǵan ofıserleri men áskerı qyzmetshileri bar armııamyz jańa geosaıası jaǵdaılarda el qaýipsizdigine qaýip tóndiretin qaterlerge toıtarys berýge daıyn bolýy kerek» dep naqty aıtqan bolatyn. Sonymen birge áskerı qyzmettiń bedelin arttyryp, Qarýly Kúshterdiń materıaldyq bazasyn nyǵaıtý qajettigin atap ótti. Búgingi shara sol ıgi isterdiń bastamasy bolyp otyr, – dedi aımaq basshysy S.Trumov.
Zamanaýı jasanyp-jabdyqtalǵan jańa keme – memlekettik shekarany qorǵaý isine qosylǵan tyń da jańa kúsh.
Mańǵystaý oblysy