Sankt-Peterbýrgte shyǵatyn «Nevskıı almanah» jýrnalyn burynǵy odaq quramynda bolǵan elderdiń ádebıetsúıer qaýymda bilmeıtin adam kemde-kem. 1828 jyly jaryq kórgen jýrnalda Aleksandr Pýshkın de óleńderin jarııalap turǵan kórinedi. Búginde jýrnal kemeńger aqynnyń: «Prımıte «Nevskıı almanah», on mıl ı v proze, ı v stıhah» degen eki jol lebizin ózine epıgraf etip alǵan.
Jaqynda jýrnal redaksııasynda redaktor Vladımır Skvorsovtyń shaqyrýymen qostanaılyq aqyn Aleksandra Sýslovanyń pıterlik oqyrmandarymen shyǵarmashylyq kezdesýi boldy. Kesh avtor úshin de, Sankt-Peterbýrgtegi orys ádebıetiniń belgili tulǵalary úshin de áserli ótti.
– Keshtegi áńgimemdi de, óleńimdi de ózimniń qos otanym týraly bastadym. Men negizi Lenıngradta týǵan ekenmin, biraq Qazaqstanda týdym dep aıtamyn. Sebebi 60 jyl turyp jatqan, búkil balalyq shaǵym ótken, adam bolyp, aqyn bolyp qalyptasqan, ósken-óngen jerim bolǵan soń, Qazaqstanda týmaı, qaıda týdym dep aıtamyn?!. Keshte tarıhı shahardyń «sen tur, men ataıyn» qalamgerleri otyrdy. Bul meni odan saıyn tolqytty. Men olardyń aldynda qazaqtyń seleýli dalasy, báıge, jýsan ıisi týraly óleńderimdi oqydym. Meniń óleńderimniń boıaýy dalanyń samal jelin, jýsan ıisin, qazaq tulpary tuıaǵynyń dúbirin júrekterge jetkize alsa kerek, kóziniń jasyn súrtkenderdi de baıqadym, ózim de kóńilimniń erkine, kóz jasyma ıe bola almadym, deıdi Aleksandra Ilınıchna. Pıterlikter qostanaılyq aqynnyń shyǵarmashylyǵy týraly jyly lebiz bildirip, áserli keshin jas avtorlarǵa sheberlik synyby boldy dep baǵalapty. Ol Sankt-Peterbýrgke qurqol barǵan joq edi, «Solnse na resnıchkah» atty balalarǵa arnalǵan óleńder men ertegiler jınaǵyn tartý etti. Qostanaılyq sýretshiler Aleksandra Ilınıchnanyń balalarǵa arnalǵan shyǵarmalarynyń anımasııalyq nusqasyn da jasaǵan bolatyn. Ol Qostanaıdaǵy balabaqshalarda paıdalanylyp ta júr.
– Balanyń Otanǵa, ata-anaǵa, týǵan jerge degen adamgershilik tanymy kishkentaıynan qulaǵyna sińgen óleńdermen qalyptasady. Sondyqtan balalarǵa arnalǵan shyǵarmalarǵa óte jaýapkershilikpen qaraýymyz qajet. Árbir shýmaq balany «Jaqsy degen nemene? Jaman degen nemene?» degen suraqtarǵa jaýap izdep, oılandyratyn bolýy tıis ǵoı, deıdi Aleksandra Ilınıchna. Aqynnyń balalar ádebıetine jaqyndyǵy tegin emes. Aleksandra Sýslova – oblystaǵy aıtýly pedagog. Neshe jyldan beri pedagogıka kolledjinde bastaýysh synyp muǵalimin daıyndap keledi.
– О́leńderim qazaq tiline aýdarylsa eken dep armandaımyn. Meniń patrıottyq sezimge sýarylǵan óleńderim qazaq tildi oqyrman kóńilinen de óz ornyn tabaryna senemin, deıdi Aleksandra Ilınıchna.
QOSTANAI