Májilis Spıkeri Nurlan Nyǵmatýlınniń tóraǵalyǵymen palatanyń bıýro otyrysy ótti. Onda aldaǵy jalpy otyrystyń kún tártibi naqtylandy, dep habarlady Parlament Májilisiniń baspasóz qyzmeti.
Aldaǵy sársenbide Májilis depýtattary Ýkraınamen ekstradısııalaý týraly shartty ratıfıkasııalaýǵa qatysty zań jobasyn talqylaıtyn bolady. Onda ýaǵdalasýshy memleketter Sharttyń talaptaryna sáıkes ustap berýge ákelip soǵatyn qylmystar úshin qylmystyq qýdalaýdy júzege asyrý nemese zańdy kúshine engen sot úkimin oryndaý maqsatynda suraý salýshy tarap izdestirip jatqan óziniń aýmaǵyndaǵy adamdardy ekinshi tarapqa ustap berýge mindettenedi.
Palata dene shynyqtyrý jáne sport máselelerine qatysty túzetýlerdi ekinshi oqylymda qaraıdy dep kútilýde.
Aldaǵy jalpy otyrysta gaz jáne gazben jabdyqtaýǵa qatysty zań jobasy boıynsha qorytyndy ázirleý merzimi bekitilmek.