Qazaqstan Respýblıkasy Parlamenti Senaty Tóraǵasynyń orynbasary Asqar Shákirov BUU Bas hatshysynyń jol qozǵalysy qaýipsizdigi jónindegi arnaýly ýákili Jan Todtpen kezdesti. Bul týraly Parlament Senatynyń baspasóz qyzmeti habarlady.
Taraptar jol qozǵalysynyń qaýipsizdigin arttyrý jónindegi jan-jaqty yntymaqtastyqty talqylady. Parlament Senaty Tóraǵasynyń orynbasary Asqar Shákirov halyqaralyq sarapshylardyń usynystary ulttyq zańnamany jetildirýge, quqyq qoldaný tájirıbelerin jaqsartýǵa jáne Qazaqstannyń ınstıtýttyq áleýetin nyǵaıtýǵa yqpal etetinin atap ótti.
Jan Todt óz kezeginde BUU-nyń jol qozǵalysy qaýipsizdigi jónindegi barlyq konvensııalaryn qoldaǵany jáne BUU Eýropalyq ekonomıkalyq komıssııasy alańyndaǵy jumys toptarynyń qyzmetine belsendi qatysqany úshin Qazaqstanǵa alǵysyn bildirdi. О́tken jyldarmen salystyrǵanda Qazaqstandaǵy jol qaýipsizdigin damytýdaǵy eleýli ózgeristerdi erekshe atap ótti.
BUU-nyń arnaýly ýákili yntymaqtastyq týraly aıta kelip, álemdegi jol qozǵalysy qaýipsizdigi máselelerin qozǵady. Ol qazirgi tańda júrgizýshilerdiń jol ústindegi kishigirim qatelikterden turatyn tártip buzýshylyqtary bar ekenin atap ótti. Bul – jol qozǵalysy deńgeıin tıisti deńgeıde baqylamaý; qaýipsizdik beldikteri sııaqty tıisti qurylǵylardy paıdalanýdy eskermeý; mas kúıde kólik júrgizý; júrý kezinde SMS jiberý jáne taǵy basqa máseleler bolyp otyr. Mundaı jaǵdaılardy boldyrmaý men qarapaıym qaýipsizdik erejelerin saqtaý jol-kólik oqıǵalarynyń sanyn kem degende eki esege qysqartady.
Kezdesý barysynda Senat Tóraǵasynyń orynbasary Qazaqstannyń tranzıttik áleýetin damytýdyń memlekettik baǵdarlamasyn iske asyrý, kólik joldaryn keńeıtý men sapasyn jaqsartý, sondaı-aq jol qozǵalysy salasyna tartylǵan barlyq qurylymdardyń jáne adamdardyń quqyqtary men mindetteriniń naqty júıesin retteıtin «Jol júrisi týraly» zańynyń iske asýy týraly aıtyp berdi.
BUU Bas hatshysynyń jol qozǵalysy qaýipsizdigi jónindegi arnaýly ýákili Jan Todt 2020 jylǵy 19-20 aqpanda Stokgolmde ótetin jol qozǵalysy qaýipsizdigi jónindegi úshinshi Dúnıejúzilik mınıstrler konferensııasyna qatysýǵa Qazaqstandy shaqyrdy.