Aqmola oblysyna kelgennen keıin Memleket basshysy egistik alqabyn aralap, «Aıbat» JShS-niń egin jınaý naýqanynyń barysymen tanysty. Bul týraly Aqordanyń baspasóz qyzmeti habarlady.
Qazaqstan Prezıdentine oblystyń áleýmettik-ekonomıkalyq damýynyń negizgi kórsetkishteri men agroónerkásip kesheniniń keleshegi týraly málimet berildi. Sondaı-aq Qasym-Jomart Toqaevqa dándi jáne maıly daqyldardyń jańa sorttary kórsetildi.
Memleket basshysy mehanızatorlarmen áńgimeleskende aýyl sharýashylyǵy alqaptaryn tıimdi paıdalanýdyń mańyzdylyǵyn atap ótip, memleket tarapynan agroónerkásip keshenin órkendetýge basa mán berilip otyrǵanyn aıtty.
– Memleketimiz úshin sizderdiń eńbekterińizdiń máni zor. Úkimet fermerlerge jan-jaqty qoldaý kórsetedi, aýyldyń ómir súrý sapasyn arttyrý jóninde sharalar qabyldaıtyn bolady, – dedi Prezıdent.
Kezdesý sońynda Qasym-Jomart Toqaev dıqandarǵa aýa raıynyń jaqsy jáne ónimniń mol bolýyn tiledi.