Ázerbaıjan Respýblıkasynyń Prezıdenti Ilham Álıev Túrki Keńesiniń Bas hatshysy Baǵdad Ámireevti qabyldady. Bul týraly uıymnyń baspasóz qyzmeti habarlady.
Bas hatshy B.Ámireev Prezıdent Álıevti jaqynda Túrki Keńesine múshe memleketterdiń prezıdentterimen júrgizgen suhbattary, sondaı-aq 15 qazanda Bakýde ótetin Túrki Keńesiniń 7-shi sammıtine daıyndyq týraly habardar etti. Sammıtpen tuspa-tus keletin Túrki Keńesi qurylýynyń 10 jyldyǵyna da toqtalyp, osy turǵyda uıymdastyrylatyn is-sharalar týraly áńgimeledi.
Bas hatshy sondaı-aq Prezıdent Álıevke Túrki Keńesiniń kún tártibine eleýli qoldaý kórsetkeni jáne uıym aıasyndaǵy yntymaqtastyq prosesindegi Ázerbaıjannyń syndarly jáne belsendi róli men túrkitildes memleketter arasyndaǵy kópjaqty qatynastardy damytqany úshin alǵys aıtty.
О́z kezeginde I.Álıev aldaǵy Sammıttiń erekshe mańyzdylyǵyn atap ótti. Ol О́zbekstannyń Túrki Keńesine qosylýyna jáne 2019 jyldyń 19 qyrkúıeginde Majarstanda (Býdapesht) Túrki Keńesiniń eýropalyq keńsesiniń ashylýyna qatysty qýanyshyn bildirdi. Bul keńse Keńestiń Eýropalyq Odaq elderimen jáne basqa da Eýropadaǵy halyqaralyq uıymdarmen qarym-qatynasyn jaqsartýǵa baǵyttalǵan.
Júzdesý barysynda Prezıdent pen Bas hatshy memleket basshylarynyń Túrki yntymaqtastyǵynyń ekonomıkalyq aýqymyn keńeıtý jónindegi sheshimderiniń oryndalý barysyn talqylady. Osyǵan baılanysty Bas hatshy B.Ámireev О́zbekstan úkimetiniń uıymdastyrýymen ótken Túrkitildes memleketterdiń Birikken saýda-ónerkásiptik palatasynyń I Bıznes jáne ınvestısııalyq forýmynyń nátıjeleri týraly baıandady.
Prezıdent Ilham Álıev múshe memleketter men Túrki keńesi hatshylyǵynyń birlesken kúsh-jigeriniń arqasynda Túrki keńesiniń aldaǵy sammıti barlyq túrki halyqtarynyń ıgiligi úshin tabysty tarıhı oqıǵa bolady dep senim bildirdi.