Elimizde jan basyna shaqqandaǵy kásipkerlikten túsken paıda azaıyp barady. Esesine jaldamaly jumysshylardyń jalaqysy kóbeıip keledi.
Aldyn ala statıstıkaǵa súıensek, 2019 jylǵy tamyzda halyqtyń orta eseppen jan basyna shaqqandaǵy aqshalaı tabysy 103 816 teńgeni quramaq. Bul byltyrǵy tamyzben salystyrǵanda 9,5 paıyzǵa joǵary kórsetkish. Inflıasııany shegerip tastasańyz, naqty aqshalaı tabys 3,8 paıyzǵa kóbeıip otyr.
Statıstıka komıtetiniń málimetinshe, byltyr halyqtyń jan basyna shaqqandaǵy aqshalaı tabysy ár toqsan saıyn turaqty túrde ósken. Máselen, birinshi toqsanda orta eseppen 86 myń teńgeniń aınalasynda bolsa, ekinshi toqsanda 90-91 myń teńge, úshinshi toqsanda 95 myń teńgege jeter-jetpes bolyp, jyl sońynda 101-103 myń teńgege jetti. Osylaısha, bir jylda shamamen 15 paıyzǵa ulǵaıdy. Al bıylǵy jaǵdaı kerisinshe. Byltyr jeltoqsanda 101 myń teńge bolǵan ortasha tabys bıylǵy birinshi toqsanda 97 myń teńgege tómendedi. Ekinshi toqsannyń basynda qaıtadan 103,9 myń teńgege kóterilgenimen, odan keıingi aılarda tıisinshe 103,8 myń, 103,7 myńǵa deıin tómendep, shilde aıynda 103,5 myń teńgege quldyrady. Tamyz aıynda ǵana 103,8 myń teńgege qaıta kóterildi.
Statıstıka komıtetiniń málimetinshe, qyrkúıekte qyzmetkerlerdiń ortasha jalaqysy 188 634 teńgeni qurady. Bir aıta keterligi, kóktemnen beri jalaqymen kún kóretin halyqtyń tabysy turaqty ulǵaıyp kele jatqany baıqalady. Máselen, mamyr aıynda halyqtyń aqshalaı tabysynyń 70,9 paıyzy jalaqyǵa tıesili bolsa, tek 11,2 paıyzy ǵana kásipkerlikten túsken tabystyń úlesinde. Qalǵan 17,2 paıyzy áleýmettik kómekke tıesili.
Jaz bastalysymen kórsetkish qubyla bastady. Maýsym aıynda aqshalaı tabystaǵy jalaqynyń úlesi 71,1 paıyzǵa, shilde aıynda 71,9 paıyzǵa kóbeıgenimen, tamyzda qaıtadan 71 paıyzǵa tómendep ketti.
Prezıdenttiń áleýmettik tólemderdi kóbeıtkeni halyqtyń áleýmettik tólemderge arqa súıeýine túrtki boldy deı almaımyz. Sebebi mamyr aıynda halyqtyń aqshalaı tabysyndaǵy áleýmettik tólemderdiń úlesi 17,2 paıyz bolsa, jazdyń alǵashqy eki aıynda tıisinshe 17 paıyzǵa jáne 16,7 paıyzǵa tústi. Tamyz aıynda ǵana kúrt kóbeıip, 17,6 paıyzǵa jetti.
Al kásipkerlikten túsken tabys bıyl jaz boıy turaqty túrde tómendep kele jatyr. Halyqtyń aqshalaı tabysyndaǵy kásipkerlikten túsken kiris mamyr aıynda 11,2 paıyzdy qurasa, maýsym aıynda 11,1 paıyzdy, shildede 10,7 paıyzdy qurady. Al tamyzda tipti 10,5 paıyz ǵana boldy. Jalpy, halyqtyń tabysy turaqty túrde ósip kele jatqanyn eskersek, kásipkerlik qyzmetten túsken tabystyń turaqty tómendeýi halyqty jappaı shaǵyn jáne mıkrobızneske tartýǵa keri áser etetin sekildi. Naqtyraq aıtqanda, kásipkerlikten túsken tabystyń azaıýy men jaldamaly jumysshylardyń jalaqylarynyń kóbeıýi halyqty kásipkerlikke emes, kerisinshe kásibı maman bolýǵa ıtermeleı túspek.