24-25 qazan kúnderi Memleket basshysy Qasym-Jomart Toqaevtyń shaqyrýy boıynsha Belarýs Respýblıkasynyń Prezıdenti Aleksandr Lýkashenko Qazaqstan Respýblıkasyna resmı saparmen keledi. Bul týraly Prezıdenttiń baspasóz hatshysy Berik Ýálı óziniń Facebook paraqshasynda jazdy.
«Joǵary deńgeıde ótetin kelissózder barysynda Qazaqstan men Belarýs arasyndaǵy strategııalyq seriktestiktiń ahýaly men perspektıvalary talqylanatyn bolady. Sonymen qatar memleketter basshylary TMD, Eýrazııalyq ekonomıkalyq odaq jáne basqa da kópjaqty qurylymdar aıasyndaǵy eki eldiń ózara yqpaldastyǵyn damytý, sondaı-aq, óńirlik jáne halyqaralyq kún tártibindegi mańyzdy máseleler jóninde pikir almasady dep josparlanýda. Sapar qorytyndysy boıynsha birqatar ekijaqty kelisimderge qol qoıylady», delingen jazbada.