Lotereıa bıznesine áleýmettik alymdardan bólek qosymsha qun salyǵy salyndy. Salyq aýyrtpalyǵynyń artýyna baılanysty damyp kele jatqan naryq edáýir báseńdedi. Qazaqstandaǵy lotereıa bıznesi úshin salyq aýyrtpalyǵyn tómendetý – naryqty damytýdyń basty máselesi bolyp tabylady. Qyzmettiń bul túrine qosylǵan qun salyǵyn (QQS) salý 2018 jyly eki jyldyq qyzmet barysynda endi damyp kele jatqan «Sátti Juldyz» AQ biryńǵaı lotereıa operatoryna soqqy boldy.
«Búginde biz Eýrazııalyq ekonomıkalyq odaq (EAEO) elderinde biryńǵaı lotereıa qurý úshin jumys istep jatyrmyz. Bizge EAEO elderinen jáne álemniń basqa elderinen bir aıyrmashylyq kedergi keltirýde. Bul – bizdiń qyzmetimizdiń qurylymynda eshqandaı qosylǵan qunnyń bolmaýyna qaramastan, elimizde 2018 jyldyń 1 qańtarynan bastap lotereıalyq qyzmetke QQS salynýy. Bizdiń salamyzǵa QQS engizý qısynsyz. El Prezıdenti salyq saıasatyna damyǵan elderdiń ozyq tájirıbelerin engizý qajettiligi týraly aıtqanyn atap ótkim keledi. Biz bárin kerisinshe isteýdemiz», deıdi «Sátti Juldyz» AQ prezıdenti Aleksandr Ten.
QQS ulttyq operatordyń barlyq satýyna, sonyń ishinde aınalymnyń 70%-yn quraıtyn júlde qoryna salynady, al bul «Lotereıalar jáne lotereıa qyzmeti týraly» zańǵa qaıshy keledi. Onyń úlesin arttyra otyryp, «Sátti Juldyz» AQ iske asyrý dınamıkasyn jaqsartýdy josparlap otyr. Aıta ketetin jaıt, zańnama boıynsha júlde qorynyń deńgeıi 50%-dy quraýy múmkin.
Bul rette úlken qarjylyq aýyrtpalyqpen qatar, biryńǵaı operatordyń eldegi sportty qoldaý mindettemesi bar. Kompanııa qyzmet etý kezeńinde óziniń áleýmettik jaýapkershiligin sezine otyryp, sportty damytýǵa 286 mıllıon teńgeden astam qarajat aýdardy. Zańǵa sáıkes, satylym jáne júlde qory arasyndaǵy aıyrmashylyqtyń 10%-y sportty damytý úshin aýdarylý kerek. Alaıda, «Sátti Juldyz» AQ oıynnyń jalpy kirisiniń 15%-yn aýdarý týraly bastama kótergen. 2018 jyldyń shildesine deıin aýdarymdardy alýshy Qazaqstan Respýblıkasynyń Sportty damytý qory boldy, keıin barlyq maqsatty qarajat Ulttyq Olımpıada komıtetine jiberiletin boldy.
«Biz lotereıalyq qyzmetke QQS engizý týraly sheshim qabyldanbaǵan kezde eldegi sportty damytýǵa baǵyttalǵan shegerimder boıynsha kóterińki mindettemelerdi qabyldadyq. Iаǵnı, sol kezde qalyptasqan halyqaralyq tájirıbege, sonyń ishinde Eýrazııalyq odaq elderine sáıkes keletin jaǵdaılar áreket etti. Iá, sheteldegi lotereıa kompanııalary qandaı da bir aksızdi, nemese shegerimderdi tóleıdi. Biz sportqa qarjy salamyz», dedi Aleksandr Ten.
Lotereıalardy taratýǵa mamandandyrylǵan seriktestik jeliler de fıskaldyq júktemeni kóteredi. Dıstrıbıýtorlar olarǵa alymdardy patenttik rejimde tóleý múmkindigin berýdi suraýda. Búgingi tańda olar úshin mólsherleme 3% deńgeıinde belgilengen, deıdi «Qazaqstan Lotereıa odaǵynyń» atqarýshy dırektory Aleksandr Mýhın. Bul jaǵdaı osy saladaǵy ShOB-tiń damýyna kedergi keltiredi, deıdi ol. Búginde onda 3 myńnan astam kásipker jumys isteıdi.
Jańartylǵan Salyq kodeksindegi qatelikti Parlamentte de moıyndady. Zań shyǵarýshy organ lotereıa qyzmetine qatysty túzetýler paketin qarastyrýda. Májilis depýtattarynyń bastamasy boıynsha lotereıa kompanııalary úshin QQS-ty alyp tastaý usynylady. Búgingi tańda qujat Úkimette tujyrymyn aldy. Budan keıin osy máseleni Parlamenttiń eki palatasynda plenarlyq otyrysta talqylaý bolady. Atap aıtqanda, kún tártibinde kelesi túzetýler bar: taratýshylarǵa salyq salý patentin nemese jeńildetilgen rejimin qoldaný múmkindigine túzetýler engizý; lotereıa úshin QQS-ty alyp tastaý; basqa lotereıalardy jarnamalaýǵa jáne jarnamada «lotereıa» sózin qoldanýǵa tyıym salý, sondaı-aq osy buzýshylyqtar úshin ákimshilik aıyppul salý; lotereıalardy túrine qaraı bólýdiń negizgi ólshemderin zańǵa engizý, sondaı-aq lotereıalardyń jekelegen túrlerin zańnan týyndaǵan aktiler deńgeıinde retteıtin erejelerdi engizý.
Aıta kestek, sońǵy birneshe jyl ishinde lotereıa naryǵynda kóptegen ózgerister oryn aldy, sonyń ishinde 2016 jylǵy 9 sáýirde «Lotereıalar jáne lotereıa qyzmeti týraly» zańynyń qabyldanýy jáne 2017 jyldyń aqpanynda biryńǵaı lotereıa operatorynyń tańdalýyn aıtýǵa bolady. Báıgege qatysqan 9 kompanııa ishinen operator bolyp «Sátti Juldyz» AQ saılandy. 2018 jyldan bastap osy salada aıtarlyqtaı ósý baıqalady. Osy ýaqytta kompanııa aınalymy 10 881 621 000 teńgeni qurady. 2018 jyly kórsetkish 2,6 mıllıard teńgeni qurap, 2016 jylǵy lotereıa salasyndaǵy jalpy jyldyq aınalymnan asyp ketti. 2019 jyldyń toǵyz aıynda lotereıa salasyndaǵy aınalym 4 mıllıard teńgege jetti.