..qoldaý bildiredi
Tańdaýymyz – jemqorlyqsyz bolashaq
Elbasy N.Nazarbaev «Paraqorlyq, sybaılas jemqorlyq jaılaǵan elde ádiletsizdik, ımansyzdyq, qyzǵanysh qaýlap tamyr jaıady. Sybaılas jemqorlyqpen kúresti eshkimniń bet shyraıyna, laýazymyna, shen-shekpenine qaramaı júrgizý kerek», degen edi.
Elbasymyzdyń osy sózin negizge ala otyryp, jastar arasynda sybaılas jemqorlyq degen uǵymdy túsindirý, oǵan qarsy sharalar júrgizý maqsatynda Saǵı Jıenbaev atyndaǵy oblystyq jasóspirimder kitaphanasy Aqtóbe gýmanıtarlyq kolledjinde «Adaldyq – ardyń isi» taqyrybynda sybaılas jemqorlyqqa qarsy dóńgelek ústel uıymdastyrdy. Onda stýdentterge sybaılas jemqorlyq, onyń týýynyń sebepteri, sońǵy statıstıkalyq málimetter týraly aqparattar berildi.
Is-shara barysynda toptyń kýratory Gúlmıram Qosymqyzy stýdentterge sybaılas jemqorlyq týraly túsindirdi. Stýdentterge sıtýasııalyq tapsyrmalar berilip, top ishinde talqylanyp, sahnalanyp, jaýaptar alyndy. Sonymen qatar «Jemqorlyq qoǵam derti», «Sybaılas jemqorlyq – áleýmettik qastyq» taqyryptarynda slaıdtar men vıdeo sholý kórsetildi.
Shyraılym QUDASOVA,
S.Jıenbaev atyndaǵy oblystyq jasóspirimder kitaphanasynyń qyzmetkeri
AQTО́BE
…úmit artady
Qazaq kúresin baǵdarlamaǵa engizý qajet
Halyqaralyq qazaq kúresi federasııasy – ulttyq sport túrin álemdik deńgeıde damytyp, halyqaralyq seriktester men sportshylardyń basyn biriktirip júrgen birlestik. Federasııanyń qurylǵanyna nebári eki jyl bolsa da, osy ýaqyt aralyǵynda aýqymdy jumystar atqaryp keledi. Onyń ústine, álem boıynsha da ulttyq sportymyzǵa qyzyǵýshylyq tanytqandar sany kún sanap artýda.
«Osyndaı ilkimdi ister aldaǵy ýaqytta da jalǵasyn taýyp, óz jemisin berý úshin qazaq kúresin mektep baǵdarlamasyna engizý qajet, – deıdi «Halyqaralyq Qazaq kuresi» federasııasynyń bas hatshy-keńesshisi Ulan Rysqul. – Qazaq kúresinen kóptegen mekteparalyq saıystar, klýbtarda chempıonattar uıymdastyrǵan jón. Bul ulttyq sportymyzdyń damýyna yqpal etedi. О́ıtkeni qazaq kúresi ultymyzdyń abyroıy, halqymyzdyń qazynasy».
Osy kúni federasııa álem boıynsha óz odaqtastaryn jınaı alatyn, shetelde ulttyq kúresten bedeldi týrnırlerdi ótkizetin jalǵyz sport federasııasy atanǵan. Federasııa quramyna 29 shetel jáne eki halyqaralyq sport uıymdary kirdi. Jaqyn arada taǵy 10 sheteldik memleket qosylady degen senim bar. Eýropa jáne álem chempıonattaryn sátti uıymdastyrǵannan keıin, halyqaralyq federasııa qazaq kúresin Jazǵy Olımpııa oıyndarynyń baǵdarlamasyna qosýǵa yntaly.
Aman BOLSYN
...renish bildiredi
Shirkinder nesine shirenedi eken?
Shymkentte vokzaldan túse salyp elektrondy bıletimdi qyzyl bıletke aýystyryp alaıyn desem, kassanyń ar jaǵynda otyrǵan jap-jas qyzdardyń qabaǵynan qar jaýyp, burylyp ta qaramaıdy ǵoı, shirkinder. Tipti jaýap berýge erinedi. Quddy óziniń úıinde otyrǵan sııaqty shirenedi... Bir-birin jumsap júrip, aqyrynda bireýi qyzyl bıletti dálizde turǵan bankomat sııaqty apparattan alatynymyzdy aıtty. Onyń tilin bilmeımiz. Sol mańda júrgen qyzmetkerlerden surasam, bári basyn shaıqap «bilmeımiz» deıdi. Jalynsaq ta apparatqa jolaǵysy joq. Qudaı biledi, «О́lip bara jatyrmyn» deseń, «Ol endi ózińizdiń sharýańyz ǵoı» dep jaıbaraqat teris aınalyp kete beretin sııaqty.
Poıyzda kele jatyp Agata Krıstıdiń Erkıýl Pýaro týraly áńgimelerin oqydym. Bul HH ǵasyrdyń basynda bolǵan oqıǵalar ǵoı. Pýaro da poıyzda kóp júredi. Sol zamandaǵy vokzal qyzmetkerleriniń sapaly qyzmetin aıtsańyzshy...
Qazir HHI ǵasyr. Bizdiń qyzmetkerler áli kúnge ózderin bıshigeshterdeı sezinip júr. Sol órkenıetke qashan jetemiz? Mundaı jaǵdaı barlyq óńirde bar ekeni anyq. Qansha jerden ekonomıka, qarjy, damý, jańa tehnologııa desek te adamnyń sanasynda úlken tóńkeris bolmaı, istiń bári beker me dep qaldym...
Oralhan DÁÝIT
ALMATY
...saqtandyrady
Qyzmettiń qyzyǵymen júrip...
Jumys babymen Qarttar úıine jolym tústi. Syrtqy esikten kirgennen-aq dálizdiń oń jaǵyndaǵy oryndyqta otyrǵan ájeıdiń tesile qaraǵan nazaryn sezindim. Tipti ary ótip ketsem de «Ájeı nege sonsha qarady?» degen oı kóńilimnen ketpeı qoıdy. Jumystarymdy bitirip, shyǵyp bara jatyp ol kisiniń sol jerde áli otyrǵanyn baıqadym. Taǵy da maǵan tesile qarady.
– Amansyz ba, ájeı! Meni bireýge uqsattyńyz ba?
– Joq, qalqam, balań bar ma?
– Allaǵa shúkir, bar.
– Jumys isteısiń be?
– Iá.
– Qaraǵym, ómirdiń ádemi, biraq kózdi ashyp-jumǵansha óte shyǵatyn qysqa shaǵy – jastyq. Sol shaqta bárimiz de jaqsy qyzmet atqaryp, ataq-dańqqa ıe bolǵandy qalaımyz. Tipti sonyń izin qýyp ketetinimiz de bar. Sóıtip júrip, adamzattyń ómirge kelgendegi eń negizgi muraty – artyna urpaq qaldyrýdy ýaqytsha qyzyqtyń kóleńkesinde qaldyryp ketemiz. Men de sóıtkem. Jaqsy qyzmetterdi atqardym. Abyroıly attan da kende bolǵam joq. Ataq-dańqym arta tússin dep bar ýaqytymdy sarp ettim. Jar súıip, balaly bolýdy keıinge qaldyra berdim. Barymdy arnaǵan qyzmetim boıdan ál-qýat ketip, ózgeniń kómegine zárý eter qarttyq jetkende nárin soryp, qaldyǵyn laqtyra salǵan jemis sekildi etip zeınetke shyǵaryp jiberdi. Qyzmettiń qyzyǵymen júrip jalǵyzdyqty sezinbeppin. Keń saraıdaı úıde bos otyrǵanymda ǵana jalǵyzdyq janymdy jabyrqatty... Bir kúni qatty aýyrdym. Bas kóterer halim joq. Dárimdi ákelip berer eshkim bolmady qasymda. Iá, baýyrlarym bar. Árqaısysy óz otbasynda. Sanaýly kúnge kelip, ketedi. Qysylǵanymda qasymnan tabylýǵa shamalary kele bermeıdi. Eger «Qarttar úıi» bolmasa, qaıda barar edik?..
Ájeıdiń áńgimesinen kóńilim bosap, janarym jasqa toldy. Biraq keıýananyń kózinen bir tamshy da kórinbedi. Muńǵa toly kózderi «Jalǵyzdyqta jylaı-jylaı jas ta qalmaǵan» degendi uqtym. «Qyzmet – qoldyń kiri», belgili bir ýaqytta jýylady da ketedi. «Balaly úı – bazar», kóńilińdi ósiredi, ómirińdi nurlandyrady...
Qamar QARASAEVA