Reseı Federasııasynyń Rıazan oblysy Qasymov qalasynda Joshy ulysynan shyqqan Oraz-Muhammed sultanǵa memorıaldy taqta ornatyldy. Bul týraly Reseıdegi Qazaqstan elshiliginiń baspasóz qyzmeti habarlady.
Saltanatty shara Reseıdiń mádenı muralar nysanyna engen Aýǵan-Muhammed sultannyń kesenesine jaqyn jerdegi Eski tatar zıratynda ótti.
«Qadirmendi halaıyq, osynaý qasıetti Qasymov jerinde qasıetti babamyz Oraz-Muhammed Ondanulyna qoıylǵan taqtany ashyp turmyz. Arýaǵy qabyl etsin. Sóz joq bir tulǵaǵa ǵana emes tutas bir dáýirge, sonaý alasapyran dáýirdegi qazaq sultandyǵynyń Reseıdegi tarıhı izine ǵana emes, eki halyqtyń arasyndaǵy dostyq pen yntymaqtyń birlik pen tirliktiń ózine qoıylǵan eskertkish dep bilemin. Sol sebepti búgingi Oraz-Muhammedtiń esimi búgingi urpaq sanasynda orys qazaq dostyǵynyń sımvoly ári eki el arasyndaǵy dıplomatııalyq alys-beristiń qarlyǵashy retinde máńgi saqtalady», degen elshi Imanǵalı Tasmaǵambetov bastamaǵa qoldaý kórsetken Rıazan oblysy ákimshiligi men dıplomatııalyq ókildigine alǵys bildirdi.
Memorıaldyq taqtany jasaý úshin tabıǵı qońyr tústi granıt paıdalanylǵan. Eskertkishtiń bıiktigi úsh metr. Tóbesine doǵal kúmbez ornatylǵan. Estelik taqtaǵa «Oraz-Muhammed Ondanuly, 1573-1610. Qazaq sultany, Qasym handyǵyn bıleýshi» dep jazylǵan.
Eske sala keteıik, 2019 jyldyń qazan aıynda Qazaqstan jurtshylyǵy Oraz-Muhammed sultannyń týǵanyna 447 jyl tolýyn atap ótken bolatyn. Oraz-Muhammed sultan Qazaq handyǵynyń negizin qalaǵan Jánibek hannyń tikeleı urpaǵy, Táýekel hannyń inisi Ondan sultannyń uly. Ol óz zamanynda orys patshasyna baǵynyshty aımaqta handyqty bılep, qazaq sultandarynyń arasynda shet elde úlken abyroıǵa ıe bolǵan áıgili tarıhı tulǵanyń biri.
Oraz-Muhammedtiń erligi men ómiri týraly kóptegen derekterdi jat jerde sultannyń senimdi serigine aınalǵan shejiresi Qadyrǵalı Jalaırı jazyp qaldyrǵan. Jazýshy Muhtar Maǵaýınniń «Alasapyran» atty tarıhı romanynda qazaq sultanynyń qaıratkerligi, parasattylyǵy men qaharmandyq kelbeti sheber sýretteledi.