Uzyndyǵy 100 metrden asatyn, salmaǵy 1400 tonna splıtter-baǵana. «AtyraýMunaıMash» zaýyty osyndaı biregeı qurylǵy jasap shyǵardy.
Munaı-gaz salasyna qajet iri gabarıtti jáne asa aýyr jabdyqtar daıyndaıtyn bul zaýyttyń elimizde ǵana emes, taıaý shetelderde de balamasy joq. Al jańa qurylǵy «Ulttyq ındýstrıaldy munaıhımııalyq tehnoparki» arnaıy ekonomıkalyq aımaǵynda ornalasqan ıntegrasııalanǵan gaz-hımııa kesheni jobasynda paıdalanylady. Jylyna 500 myń tonnaǵa deıin polıpropılen óndiretin bul kásiporyn 2021 jyly iske qosylady.
Jańa qondyrǵyny tıisti jerine aparýǵa aıryqsha daıyndyq jumystary júrgizildi. «Iri gabarıtti splıtter-baǵana zaýyt aýmaǵynan Qarabatandaǵy keshenge tórt kúnde jetkiziledi. Tasymaldaý kúndizgi ýaqytta saǵatyna 3 shaqyrym jyldamdyqpen iske asyrylady»,- deıdi joba basshysy Azamat Izteleýov.
Aıta keteıik, mundaı óte úlken splıtter-baǵana elimizde alǵash ret jasalyp otyr. Ol gaz-hımııa kesheninde propan men propılendi bólýge qoldanylady.
ATYRAÝ