Úlken úmitpen úkilep attandyrǵan «Qazaq arýy-2019» Mádına Batyq bul kúnderi «Tumandy Albıonda» álemdik deńgeıdegi aqyl-parasat jarysyna qosylyp ta ketti.
Ulttyq sulýlyq tájin kıgen Mádına Batyq qazir 120 memleketten kelgen sulýlarmen birge «Álem arýy» dıreksııasy uıymdastyryp jatqan túrli sharalarǵa qatysyp, qosymsha atalymdar boıynsha qarym-qabiletin kórsete bastady. Dúnıejúzilik jarystyń aqtyq syny 14 jeltoqsanda ótedi.
Qazirdiń ózinde kári Eýropadan jaqsy jańalyqtar jetip jatyr. Mádına aldyn ala ótkizilgen baıqaýdyń úzdik TOP-10 modelderi jarysynda alǵashqy ondyqtyń qatarynda saltanat quryp jatyr. Osylaısha, mundaı aralyq nátıjeler bizdiń sulýymyzdy baıqaýdyń bastapqy kezeńderinde-aq daralady. Demek, atalǵan atalymda qazaq qyzynyń top jarýdan úmiti ulǵaıdy. Bul jarystyń qorytyndysy «Álem arýynyń» sońǵy sátterinde jarııa bolady. Al árbir atalym boıynsha jınaǵan baldar qyzdardy kúlli álemniń kórkemi ekendigin aıǵaqtaıtyn tájge tezirek jaqyndata bermek.
Sonymen fınaldyq shoý bastalǵanǵa deıin Mádına da álemniń ár túkpirinen kelgen sulýlarmen birge túrli daıyndyqtarǵa, qaıyrymdylyq jobalaryna, sporttyq sharalarǵa, fotosessııalarǵa, eń úzdik ulttyq kıim men talanttar baıqaýyna qatysa bermek.
Sondaı-aq sulýlardyń sulýlary Londonnyń kórikti, tarıhı jerlerinde uıymdastyrylǵan kóshe sáni fotosessııalaryna qatysyp úlgergen.
Sol sııaqty onlaın-daýys berýdiń bastalýyna da sanaýly kúnder qaldy. Al kerekýlik qyzymyzǵa otandastarynyń qoldaýy da osy kezde qajet bolmaq.
Al Qazaqstannyń sulýlyq tájin kıgen qyz sáýirden beri óziniń aǵylshyn tilinen bilimin jetildirip, dene bitimin jaqsarta túsýi tıis bolatyn.
Álemdik saıysqa joldama alǵan sulý týraly «Qazaqstan arýy» jobasynyń túsirý toby «Qazaqstan týraly ádemilikpen» atty tusaýkeser fılmin jasaǵan edi. «Qazaqstan arýyn» «Álem arýy-2019» baıqaýynda búkil dúnııaǵa tanystyratyn kartınada Uly dalamyzdyń eń kórikti jerleri, qasıetti mekenderi, elimizdiń ǵajaıyp ólkeleri men tabıǵat tamashasy da qosa saltanat quratyn bolady.
Qazaqstan arýyn tanystyratyn tusaýkeser fılm elimizdiń túrli tabıǵatyn, asqar taýlary men barqyt qum dalasyn qamtı kele, Uly Jibek joly boıymen júrip otyryp, 20 jylda ásem qalaǵa aınalǵan elimizdiń astanasynda márege jetedi. Osylaısha qazir jıyrmaǵa tolǵan Mádına Batyq shırek ǵasyrǵa da jetpeıtin aralyqta megapolıs shaharǵa aınalǵan Nur-Sultan qalasy, Qazaqstan týraly ádemilikpen áńgimesin aıaqtaıdy.
ALMATY