Premer-Mınıstr Asqar Mamın Katar Memleketiniń Ortalyq bankiniń tóraǵasy Abdalla ben Saýd ál-Tanı bastaǵan delegasııany qabyldady. Bul týraly Premer-Mınıstrdiń baspasóz qyzmeti habarlady.
«Katar ‒ Qazaqstannyń arab álemindegi mańyzdy saıası seriktesi. Bizdiń elderimiz arasynda Qazaqstannyń Tuńǵysh Prezıdenti ‒ Elbasy N. Nazarbaev pen Katardyń joǵary basshylyǵy negizin salǵan senimdi ári ashyq saıası dıalog ornaǵan. Memleket basshysy Q.Toqaev syrtqy saıasattaǵy sabaqtastyqty ustana otyryp, Katarmen yntymaqtastyqty damytýǵa úlken mán beredi», dedi A. Mamın.
Úkimet basshysy saýda-ekonomıkalyq, ınvestısııalyq, qarjy-bank jáne basqa da salalardaǵy yntymaqtastyqty arttyrý úshin edáýir áleýettiń bar ekenin atap ótti.
Elder arasynda vızasyz rejım ornaǵan, jaqynda Nur-Sultan men Doha arasynda tikeleı reıster ashylady dep josparlanýda. Odan soń turaqty reıster aptasyna 7 ret tek astanalar arasynda ǵana emes, sonymen qatar Almaty men Doha arasynda da oryndalmaq.
Taraptar ınvestısııalyq jáne qarjy-bank salasyndaǵy ekijaqty yntymaqtastyq perspektıvalaryn, onyń ishinde «Astana» Halyqaralyq qarjy ortalyǵynyń (AHQO) ıýrısdıksııasynda katarlyq bankter ókildikterin ashýdy talqylady.
Eki el kásipkerleriniń arasyndaǵy baılanystardy damytý jáne birlesken ınvestısııalyq jobalardy iske asyrý maqsatynda 2020 jyly kóktemde Qazaqstan-Katar bıznes-forýmyn ótkizý týraly kelisimge qol jetkizildi.
Kezdesýge Premer-Mınıstrdiń Birinshi orynbasary - qarjy mınıstri Á. Smaıylov, ulttyq ekonomıka mınıstri R. Dálenov jáne AHQO basqarýshysy Q. Kelimbetov qatysty.