Aýa raıynyń qolaısyzdyǵyna baılanysty birqatar óńirdiń avtojoldarynda kólik qozǵalysyna tyıym salyndy. Bul týraly IIM Tótenshe jaǵdaılar komıtetiniń baspasóz qyzmeti habarlady.
Atap aıtqanda, 5 jeltoqsan kúni saǵat 19:00 bastap jaýyn-shashyn jáne kóktaıǵaqqa baılanysty respýblıkalyq mańyzy bar A-1 «Nur-Sultan-Petropavl» avtomobıl jolynyń 304-341 shaqyrym (Kókshetaý qalasynan SQO shekarasyna deıin) aralyǵy jáne 341-473 shaqyrym (Aqmola oblysy shekarasynan Petropavl qalasyna deıin) aralyǵy kóliktiń barlyq túriniń qozǵalysyna ýaqytsha jabyldy.
Sonymen qatar 5 jeltoqsan, saǵat 12:40-tan bastap Qaraǵandy oblysy aýmaǵynda da kóktaıǵaqqa baılanysty «Almaty-Ekaterınbýrg» tasjolynyń 1003-641 shaqyrym (Qaraǵandy-Balqash qalalary aralyǵy) aralyǵynda, «Qyzylorda-Pavlodar» avtojolynyń 906-424 shaqyrym (Topar kentinen Jezqazǵan qalasyna deıin) aralyǵynda júk jáne qoǵamdyq kólikterdiń qozǵalysyna tyıym salyndy.
Aqtóbe oblysynda 5 jeltoqsan kúni saǵat 20.00-den bastap qar men burqasyn saldarynan «Samara-Shymkent» respýblıkalyq mańyzy bar tasjolynyń 843-shaqyrymynan (Dóń aýyly) 965-shaqyrymyna deıingi (Qarabutaq aýyly) aralyǵynda qozǵalys toqtatyldy.