Senat otyrysynda Qazaqstan men Túrkııa úkimetteri arasyndaǵy Áskerı yntymaqtastyq týraly kelisim ratıfıkasııalandy. Bul týraly Parlament Senatynyń baspasóz qyzmeti habarlady.
Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed NATO-nyń Túrkııadaǵy áskerı ýchılıshelerinde qazaqstandyq kýrsanttar aqysyz negizde oqyp jatqanyn atap ótti. Osyǵan deıin 200-ge jýyq ofıser oqyp shyqty, qazirgi kezde 20 kýrsant bilim alýda, sondaı-aq elimiz Qorǵanys mınıstrliginiń 14 ofıseri Túrkııanyń oqý ortalyqtarynda daıarlyqtan ótýde. «Júrgizilgen taldaý jumystary búginde Qorǵanys mınıstrligi quzyrynda jumys istep júrgen Túrkııanyń joǵary áskerı oqý oryndary túlekteriniń teorııalyq jáne praktıkalyq bilim deńgeıi joǵary ekendigin kórsetip otyr», dep atap ótti M. Qul-Muhammed.
Senator Muratbaı Joldasbaev túrik kýrsanttarynyń Qazaqstanda bilim alatyndyǵy týraly qorǵanys mınıstriniń orynbasary Tımýr Dándibaevtan surady. T.Dándibaev qazirgi kezde Túrkııanyń 16 áskerı qyzmetkeri Qazaqstannyń Tuńǵysh Prezıdenti – Elbasy atyndaǵy Ulttyq qorǵanys ýnıversıtetinde oqyp jatqany týraly aıtty.
Qujatty ratıfıkasııalaý Qazaqstannyń áskerı saladaǵy múmkindikterin keńeıtedi, áskerı yntymaqtastyqtyń damýyna oń yqpal etedi. Kelisim mamandar daıarlaý men oqytýmen qatar birlesken jattyǵýlar ótkizýge, ǵylymı jáne tehnıkalyq zertteýlerdi júzege asyrýǵa, qorǵanys ónerkásibiniń yntymaqtastyǵyna, sondaı-aq kartografııa, gıdrografııa, topogeodezııa salalary boıynsha qamtamasyz etýge qatysty bolady.