Almaty haıýanattar baǵy jan-janýarlar mekeni ǵana emes, balalarǵa tabıǵatty aıalaýǵa, janýarlar álemin tanýǵa múmkindik beretin tanymdyq ortalyq deýge negiz bar.
Jan-janýarlardy úı jáne jabaıy janýarlar dep qarastyratyn bolsaq, Almaty zoobaǵynda janýarlardyń eki túrine de qamqorlyq jasalady. Munda janýarlar álemin tanýǵa, osy zoobaqty turaqty mekendeýshilerdi zertteıtin ǵalymdar eńbek etedi. Olardyń kúndelikti tirshiligi mamandardyń jiti baqylaýynda.
Alkor nemese Kolıa esimdi aq aıý - osy haıýanattar baǵynyń baıyrǵy mekendeýshisi. Búgingi kúni 30 jasqa tolǵan aq aıý zoobaqqa kelýshilerdiń de qyzyǵýshylyǵyn týǵyzyp otyr. Aıýdyń jasy adam jasyna shaqqanda júzdi kórsetedi. Ǵalymdardyń zertteýlerine sáıkes, tabıǵat aıasynda aq aıýlar 20 jasqa deıin, urǵashylary 25-30 jasqa deıin ómir súredi. 1990 jyly Almaty zoobaǵyna ákelingen Alkor 1989 jyly Kalınıngradtaǵy haıýanattary baǵynda týǵan. Alkordyń urǵashy Krıstınadan Ýmka esimdi qonjyq týylǵan. Ýmka qazir Chehııa zoobaǵynda. Alkor et, balyq jegendi unatady. Balyq maıy, kókónis pen jemis-jıdek te onyń turaqty azyǵy.
Búginde Alkor zamanýı volerde tirshilik etýde. Alkor úshin áınekpen qaptalǵan, basseıni bar, kógaldanǵan, turaqty sý aǵyp turatyn jaǵdaı Mesenat Sergeı Spısyn tarapynan jasalǵan bolatyn.
ALMATY