Osydan 4-5 kún buryn Ile aýdandyq aýrýhanasyna 9 aılyq sábıdiń ata-anasy shaǵymdanyp, balanyń jaǵdaıy aýyrlap bara jatqanyn aıtady. Dárigerlerdiń alǵashqy tekserýi nátıje bermegennen keıin sábıdi О́tegen batyr kentindegi aımaqtyq balalar aýrýhanasyna jóneltedi.
Bilikti mamandardyń tolyq tekserýinen keıin sábıdiń ishki qurylysynda kinárat bary anyqtalady. Shyryldap jylaǵan bala da súırik saýsaǵymen ishin búrip ustaı bergen eken. Rentgen qorytyndysy asqazanda bógde zattyń jabysyp turǵanyn kórsetti. Dárigerler dereý ota jasaýǵa sheshim qabyldaıdy.
Birneshe saǵatqa sozylǵan otadan keıin hırýrgtar sábıdiń asqazanynan temir alqanyń áshekeıin alyp shyqty. Balaqaı ony shamamen 11 kún buryn jutyp qoıǵan eken. Qazir 9 aılyq sábı dárigerdiń baqylaýynda, densaýlyǵy ońalyp keledi.
Aıtpaqshy, osydan eki aı buryn О́tegen batyr kentinde ornalasqan aımaqtyq balalar aýrýhanasynyń hırýrgtary 8 jastaǵy qyz balanyń asqazanyna ota jasap, 1 jarym kılogramm shash alyp shyqqan bolatyn.
Almaty oblysy