S.Báıishev Aqtóbe oblysyna qarasty Baıǵanın aýdanynyń Aqjar aýylynda týyp-ósken. Belgili qoǵam qaıratkeri, ǵalym.
1937 jyly Almatydaǵy Marksızm-lenınızm ınstıtýtyn bitirgen soń birden osy jerge qyzmetke alynyp, keıin Marksızm-lenınızm qazaq ǵylymı-zertteý ınstıtýtynyń dırektory da boldy. 1938 jyldyń sáýirinen 1940 jyldyń jeltoqsanyna deıin “Sosıalıstik Qazaqstan” gazetiniń jaýapty redaktory mindetin atqardy. Osymen bir mezgilde Almaty joǵary oqý oryndarynda dáris te berdi.
S.Báıishev Uly Otan soǵysyna basynan aıaǵyna deıin qatysyp, 100-shi atqyshtar brıgadasynyń, 364-shi atqyshtar dıvızııasynyń saıası bólim bastyǵy boldy, Keńes Armııasy Saıası bas basqarmasy apparatynda jaýapty qyzmetter atqardy.
1946-1956 jyldary ol Qazaqstan KP Ortalyq Komıteti janyndaǵy Partııa tarıhy ınstıtýtynyń dırektory, 1956-1968 jyldary qazaq KSR Ǵylym akademııasynyń vıse-prezıdenti bolýymen qatar Ekonomıka ınstıtýtynyń dırektory (1963-1967j.j.), osy ınstıtýttyń bólim meńgerýshisi (1968-1982 j.j.) qyzmetterin atqardy. Osy jyldar ishinde ǵalym elimizde ǵylymı kadrlar daıarlaý, jańa ǵylym salalaryn qalyptastyrý isine eleýli úles qosty. Qazaqstandaǵy sosıal-demokratııalyq qozǵalystyń tarıhyn jazý, marksızm-lenınızm klassıkteriniń shyǵarmalaryn qazaq tiline aýdaryp, basyp shyǵarý jóninde úlken uıymdastyrý jumystaryn júrgizdi.
S.Báıishevtiń ǵylymı eńbekteri Qazaqstandaǵy qoǵamdyq uıymdardyń tarıhyn, respýblıka ekonomıkasynyń damý kezeńderi men saıası ekonomıka máselelerin zertteýge arnalǵan. Ol Sh.Ýálıhanov atyndaǵy syılyqtyń laýreaty. Kóptegen ordendermen jáne medaldermen nagradtalǵan.