Búgin Nur-Sultan qalasy Qoǵamdyq damý isteri basqarmasynyń uıymdastyrýymen Jastar jyly aıasynda «Bir álem – bir ómir» «ONE WORLD – ONE LIFE» atty Halyqaralyq jastar baly ótedi. Bul týraly qala ákimdiginiń resmı saıty habarlady.
Jobanyń maqsaty qasıetti de kıeli qazaq eliniń tamyry tereńge jaıylǵan tarıhyn, ónege tunǵan salt-dástúrin, sáýleti men dáýleti kún sanap damyp kele jatqan Elordasyn dúnıejúzine tanystyrý.
Sondaı-aq jigerli jastardyń bas qosýy arqyly jahandyq máseleler jaı-kúıin sheshýge úndeý jasaý, nátıjeli qaıyrymdylyq sharalaryn júzege asyrý, ıgi sharalardyń sanyn arttyrý kózdelip otyr. Elorda jastary men álem jastary kópshilik nazaryna «Polonezadan» bastap, «Jastar valsine» deıin barlyq bı túrlerin usynatyn bolady. Ár túrli sala mamandary dárigerler, muǵalimder men memlekettik qyzmetkerler, jýrnalıster, óndiristiń qyzmetkerleri jáne t.b quralǵan elordalyq jastar bir aı kóleminde túrli qaıyrymdylyq jumystarymen aınalysty. Olar qarttar úıi men balalar úıinde rýhanı kesh uıymdastyryp, «Júrekten júrekke» aksııasy aıasynda áleýmettik jaǵdaıy tómen 100 otbasyǵa materıaldyq kómek kórsetti.
Bıyl Nur-Sultan qalasy jastarymen birge baldyń halyqaralyq deńgeıin aıqyndaıtyn Reseı, Qytaı, Nıgerııa, Tájikstan, О́zbekstan, Qyrǵyzstan, Ýkraına, Indonezııa, Venesýela elderinen debıýtanttar qatysady dep kútilýde.
Sonymen qatar «ONE WORLD – ONE LIFE» jobasy elimizdiń tanymal, mádenıet jáne qoǵam qaıratkerleriniń qatysýymen ótedi. Keshte debıýtanattarmen birge otandyq jáne halyqaralyq tanymal juldyzdar óner kórsetetin bolady.