9-22 qańtar aralyǵynda Shveısarııanyń Lozanna qalasynda jasóspirimderdiń úshinshi qysqy Olımpıadasy ótedi. Tórt jylda bir keletin dúnıejúzilik dodaǵa Qazaqstan komandasynyń sportshylary da qatysady. Bul týraly Olympic.kz habarlady.
Lozannadaǵy Jasóspirimder Olımpıadasynda álemniń 70 memleketinen 15-18 jas aralyǵyndaǵy 1880 sportshy baq synaıdy. Olımpıada oıyndarynda sporttyń 16 túrinen medaldar sarapqa salynady.
Atap aıtar bolsaq, jas sportshylar shańǵy jarysy, snoýbord, frıstaıl, shańǵy qossaıysy, taý shańǵysy, shańǵymen tuǵyrdan sekirý, alpınızm, bıatlon, shaıbaly hokkeı, shanamen syrǵanaý, bobsleı, skeleton, mánerlep syrǵanaý, short-trek, konkımen júgirý jáne kerlıngten synǵa túsedi.
Qazaqstan ulttyq quramasy Lozannadaǵy Olımpıada oıyndaryna jalpy esebi 26 joldama jeńip aldy. Salystyryp aıtar bolsaq, ulttyq qurama 2012 jylǵy Insbýrktegi Olımpıadaǵa 37 sportshy aparsa, 2016 jyly Lıllehamerde ótken qysqy oıyndarda 20 atlet baq synady.
Qazaqstandyq jas sportshylar jasóspirimderdiń qysqy Olımpıadasynan 8 medal jeńip aldy. Ázirge, altyn júlde joq.