1 qańtardan bastap 4 jáne odan da kóp kámeletke tolmaǵan balalary bar otbasylarǵa jańa memlekettik járdemaqy engizildi. Qazirgi jaǵdaı boıynsha elordalyq 15 myńnan astam otbasy atalmysh járdemaqyǵa ıe bolyp otyr. Bul týraly Nur-Sultan qalasy ákimdiginiń baspasóz qyzmeti habarlady.
Halyqtyń áleýmettik osal toptaryna kórsetiletin kómektiń jańa formatyna sáıkes, járdemaqy kópbalaly otbasylarǵa tabysyna qaramastan otbasyndaǵy balalar sanyna qaraı saralanǵan mólsherde tólenedi. Atap aıtqanda, 4 balaǵa - 42 496 teńge, 5 balaǵa - 53 127 teńge, 6 balaǵa - 63 757 teńge,7 jáne odan kóp balaǵa - 74 388 teńge.
Kópbalaly otbasylarǵa memlekettik járdemaqyǵa ótinish berý úshin qujattardy Esil, Saryarqa, Baıqońyr, Almaty aýdandarynyń Halyqqa qyzmet kórsetý ortalyqtaryna ótkizý qajet.
Qazirgi kezdegi jaǵdaı boıynsha buryn arnaıy memlekettik járdemaqy alǵan 10 266 kópbalaly otbasyǵa tólemder avtomattandyryldy. Al 2018-2019 jyldary týylǵan 4 jáne odan da kóp balasy bar 5 075 otbasyǵa memlekettik járdemaqy qaıta taǵaıyndaldy.
Eger otbasynyń jan basyna shaqqandaǵy ortasha kirisi astanada belgilengen kedeılik sheginen tómen bolsa nemese eń tómengi kúnkóris deńgeıiniń 70%-y bolsa, azamattar ataýly áleýmettik kómekke júgine alatyndyǵyn aıta ketken jón.
Esterińizge salsaq, 2020 jyldyń 1 toqsanyndaǵy eń tómengi kúnkóris deńgeıi - 34 654 teńge, KSh - kedeılik shegi - 24 258 teńgeni quraıdy.