Qytaı astanasy Beıjińde Champions Swim Series jarysynyń ekinshi kezeńi aıasynda 200 metrge brass ádisimen júzý básekesi ótti. Bul týraly Mádenıet jáne sport mınıstrliginiń baspasóz qyzmeti habarlady.
Atalǵan qashyqtyqty 2:12.36 kórsetkishimen júzip ótken Dmıtrıı Balandın 4-oryn aldy. Jarys jolyn 2.08.40-ta baǵyndyrǵan japondyq Vatanabe Ippeı top jarsa, kúmisti 100 jáne 200 metrge brass ádisimen júzýden ótken jylǵy Eýropa chempıony nıderlandtyq Arno Kammınga ıelendi. Qola medal amerıkalyq Djon Prenoǵa buıyrdy.
Beıjińde ótken Champions Swim Series kezeńiniń jalpy júlde qory 900 myń AQSh dollary. Birinshi oryn alǵan adam - 10 myń, ekinshi - 8 myń, úshinshi oryn alǵan adam 6 myń dollar alady.
Halyqaralyq júzý federasııasy (FINA) Champions Swim Series jarysyn ótken jyly bekitken bolatyn. Bul synǵa Olımpıada, álem chempıonatynyń jeńimpazdary men júldegerleri jáne eń úzdik degen sportshylar qatysady. О́tken jyly báseke Gýanchjoý, Býdapesht pen Indıanapolıste ótken edi. Jarys nátıjelerine qaraı qatysýshylarǵa álemdik reıtıngte upaı qosylady.