Kezdesý barysynda Maǵzum Myrzaǵalıev mınıstrlik jumysynyń negizgi baǵyttary boıynsha Memleket basshysy bergen tapsyrmalardyń oryndalý barysy týraly esep berdi. Bul týraly Aqordanyń baspasóz qyzmeti habarlady.
Qazaqstan Prezıdentine Ekologııalyq kodekstiń ázirlený barysy jóninde málimet berildi. Mınıstrdiń aıtýynsha, Kodekstiń jobasyn daıyndaý kezinde jurtshylyqtyń pikiri men Ekonomıkalyq yntymaqtastyq jáne damý uıymyna múshe elderdiń ozyq tájirıbeleri eskerilip, Parlament qaraýyna engizilgen.
Sonymen qatar Maǵzum Myrzaǵalıev Qasym-Jomart Toqaevqa sý resýrstaryn basqarý jáne geologııalyq barlaýdyń jańa memlekettik baǵdarlamalaryn ázirleý jumystary týraly baıandady.
Memleket basshysy mınıstrge tıisti baǵdarlamalardy daıyndaý barysynda elimizdegi sý qaýipsizdiginiń barlyq aspektilerin muqııat taldaýdy tapsyrdy. Sondaı-aq geologııalyq barlaý salasyna sheteldik ınvestorlardy tartýdyń mańyzdylyǵyn aıtty.