Qordaı aýdanynda oryn alǵan oqıǵaǵa baılanysty Úkimettik komıssııa músheleri Aýqatty aýylynda aýdannyń Qarakemer, Sortóbe, Aýqatty, Masanchı jáne Bular batyr aýyldarynyń aqsaqaldarymen kezdesken bolatyn. Aýyl aqsaqaldary, ardagerler keńesteriniń tóraǵalary, Parlament depýtattary jáne ortalyq memlekettik organdardyń basshylary qatysqan jıynda máselelerdi sheshý joldary qarastyrylyp, qoǵamda tatýlyq pen birlikti saqtaý máselesi talqylanǵan edi. Eń bastysy – kezdesýde aýyl aqsaqaldary atalǵan bes eldimekendi qamtıtyn birlesken Aqsaqaldar keńesin qurý týraly kelisimge keldi.
Búgin Qordaı aýdany, Sortóbe aýyldyq meshitinde atalǵan máselege oraı jıyn ótip, nátıjesinde «Qoǵamdyq kelisim» keńesi quryldy. Jıynǵa aýdannyń Qarakemer, Aýqatty, Qarasaı, Sortóbe jáne Masanchı aýyldarynyń qarııalary qatysty. О́z sózinde Jambyl oblysy ákiminiń orynbasary Erkebulan Daýylbaev aqsaqaldardyń qoǵamdaǵy mańyzdy rólin aıta kelip, el ishinde budan bylaı tatýlyq pen birliktiń saqtalýyna atalǵan keńestiń yqpal etetinine senim bildirdi. Al, Qazaqstan musylmandary dinı basqarmasynyń Jambyl oblysy boıynsha ókili, oblystyq ortalyq «Hıbatýlla Tarazı» meshitiniń bas ımamy Qanat Jumaǵul adamzattyń basty qundylyǵy árqashan tatýlyq ekenin, sonymen qatar, musylman qaýymyna sebepsiz qan tógýge, adamǵa zalal keltirýge bolmaıtynyn atap ótti. Budan keıin Jambyl oblysynyń Qurmetti azamaty Tóle Súgirbaı, О́tegen batyr aýylynyń turǵyny Turǵan Jasybaev, Qordaı aýdandyq ardagerler keńesiniń tóraǵasy Birjan Álimbetov jáne aýdan ákiminiń orynbasary Beıqut Jamangózov eldi sabyrlylyqqa, tatýlyqqa shaqyrdy. Aýdanda jańa qurylǵan «Qoǵamdyq kelisim» keńesi atalǵan aýyldardaǵy turmystyq máselelerdiń bárin birlesip sheshetinin aıtty. Sonymen qatar Ishar Iýsýpuly bolashaqta mundaı qaqtyǵystyń bolmaıtynyna senim bildirip, aýyl turǵyndary arasynda birlikti kúsheıtý kerektigin jetkizdi.
Alǵashqy jıyny ótip otyrǵan «Qoǵamdyq kelisim» keńesiniń quramyna atalǵan aýyldyń aqsaqaldary kiretin boldy. Keńes aldaǵy ýaqyttarda da eldegi turmystyq máselelerdi rettep, el ishindegi tatýlyq pen birlikti nyǵaıtýǵa barynsha kúsh salatyn bolady.
Jambyl oblysy