Germanııanyń Dıýsseldorf qalasynda dzıýdoshylardyń Grand Slam týrnıri bastaldy. Búgin bes salmaq dárejesi boıynsha túrli-tústi júldeler sarapqa salynýda.
Áıelder arasynda úsh salmaqta beldesýler ótti. Qazaqstan qurama komandasy músheleri arasynan jalǵyz Anna Kazıýlına (52 kılo) jarys jolyna shyqty. О́kinishke qaraı, onyń qadamy sátti bolmady. Ol tusaýkeser kezdesýinde Perý eliniń sportshysyna jol berdi.
Erler eki salmaqta kúsh synasty. 60 kılo salmaqtaǵy Maǵjan Shámshıddın Gýana ókilin utqanymen, ile-shala mońǵolııalyq Arýnbold Enhtaıvanǵa ese jiberdi. Dáýren Súıeýkenov alǵashqy kezeńde úndistandyq Iаdav Qumardy qapy qaldyrǵanymen, ekinshi aınalymda ıspanııalyq Fransısko Garrıgostan jeńildi.
66 kılo salmaq dárejesinde Qazaq eli namysyn álem chempıonatynyń kúmis júldegeri, Azııa chempıony Erlan Serikjanov qorǵaýda. Bastapqy básekelerde Halyqaralyq dzıýdo federasııasynyń týy astynda óner kórsetken Zıad Aýn jáne Úndistandyq Sanýn Sınghke san soqtyrǵan qazaq dzıýdoshysy endi grýzııalyq Lasha Margvelashvılımen kúsh synasady. Eger Erlan Qap taýy qyranyn utsa, onda júldeli oryndar úshin talasý múmkindigine ıe bolady. Utylǵan jaǵdaıda jarysty aıaqtaıdy.