Semeı qalasyndaǵy joǵary oqý orny jataqhanalarynyń birinde órt shyqty. Bul týraly Semeı qalasynyń TJB baspasóz qyzmeti habarlady.
Qalalyq Tótenshe jaǵdaılar basqarmasynyń málimetine sáıkes, oqıǵa búgin saǵat 13:00 shamasynda Fızkýltýrnaıa kóshesinde bolǵan. О́rt jataqhananyń 6-qabatynda shyqqan. Jıhaz ben tósek-oryndy sharpyǵan qyzyl jalynnyń jalpy aýmaǵy 10 sharshy metr bolǵan. Ǵımarattaǵy 80 adam órt tutana salysymen syrtqa shyqqan.
- Adamdardy evakýasııalaýǵa kómektesip júrip, ashy gaz ıisin kóp jutyp qoıǵan 1972 jylǵy kúzetshi ýlanyp, aýrýhanaǵa jetkizildi. Tilsiz jaýdy aýyzdyqtaýǵa 30 órt sóndirýshi men 6 avtosısterna jumyldyryldy. Jalyn saǵat 13:31-de tolyqtaı óshirildi. Aldyn ala boljam boıynsha órttiń shyǵýyna otty abaısyz paıdalaný nemese elektr jabdyqtarynyń apattyq jaǵdaıda bolýy sebep bolýy múmkin, - delingen habarlamada.