Abaıdyń «Jıdebaı-Bórili» memlekettik qoryq-mýzeıinde Abaı Qunanbaıulynyń 175 jyldyǵyna oraı Qunanbaı О́skenbaıulyna arnalǵan «Kóregendi kósem, parasatty sheshen, el qamqory - Qunanbaı» kórmesiniń ashylý saltanaty ótti. Mýzeıdiń jetekshi ǵylymı qyzmetkeri Nursulý Sanaqbekqyzynyń aıtýynsha, kórme tarıhı tulǵa, bı, aǵa sultan, zamanynyń kórnekti qaıratkeri bolǵan Qunanbaı О́skenbaıulynyń jalpy tulǵasyn somdaǵan. Abaı qoryq-mýzeıinde jınaqtalǵan tarıhı, ǵylymı, ádebı materıaldar paıdalanylǵan. Qunanbaı О́skebaıulynyń qoǵamdyq qyzmeti tanystyrylyp, Abaı mýzeıiniń ǵylymı-zertteý jumystarynyń nátıjesinde jınalǵan arhıv derekterin kórermen nazaryna usyndy.
- Kórmege Qunanbaı О́skenbaıulynyń ómiri men qoǵam qaıratkerligin aıshyqtap kórsetetin qundy derek kózderi, Qunanbaı taqııasy men kúmis beldigi qoıyldy, - deıdi mýzeıdiń jetekshi ǵylymı qyzmetkeri Nursulý Sanaqbekqyzy, - sol sekildi qala turǵyndary men qala qonaqtarynyń nazaryna alǵash ret Qunanbaıdyń qujat betterine qoıǵan tańbaly mórin usyndy.
Shara barysynda Abaıdyń «Jıdebaı-Bórili» memlekettik qoryq-mýzeıi dırektorynyń ınnovasııalyq damý jáne qoǵammen baılanys jónindegi orynbasary Turdyqul Shańbaı, Semeı qalasy ákiminiń orynbasary Aıdar Sadyrbaev, Shákárim ýnıversıtetiniń Tarıh jáne saıasattaný kafedrasynyń meńgerýshisi, dosent Maıra Ibraemovalar sóz sóıledi. Akademık Erlan Sydyqovtyń «Qunanbaı» kitabynyń tanystyrylymy ótti. Jáne de saltanatty keshke Shákárim Qudaıberdiulynyń urpaqtary qatysty. Abaıdyń ásem ánderinen kompozısııalar oryndalyp, oblystyq Ámire Qashaýbaev atyndaǵy fılarmonııanyń «Kerbez» falklorlyq ansambli shalqyma kúımen kórik berdi.
SEMEI