Ataqty fýtbolshy Evstafıı Pehlevanıdıdiń tarıhı otany – Grekııaǵa qonys aýdarǵanyna talaı jyldyń júzi bolsa da, óziniń kindik qany tamǵan jerge degen saǵynyshy áli basylmaǵan eken. BAQ ókilderine bergen ár suhbatynda ol únemi Qazaqstanǵa degen ystyq yqylasyn bildirip, qonaqjaı qazaq halqyna árkez aq alǵysyn jaýdyrýda.
1960 jyly shyraıly Shymkentte dúnıege kelgen Evstafııdiń sporttyq mansaby jergilikti «Metallýrgte» bastaldy. Sol kezderi ol qyraǵy mamandardyń nazaryna ilikti. 1980-1989 jyldary aralyǵynda Almatynyń «Qaırat» klýby sapynda jasyndaı jarqyrady. Talaı mańyzdy matchtarda qarsylastar qaqpasyn dál kózdep, san myń jankúıerdiń alǵysyna bólendi. Respýblıkamyzdyń bas komandasy tarıhynda Pehlevanıdıdiń esimi KSRO chempıonatynda eń kóp gol soqqan oıynshy retinde tarıhta qaldy. Ol 226 kezdesýde qarsylastar qaqpasyna 69 ret gol salǵan.
Evstafıı Pelevanıdı toqsanynshy jyldardyń basynda Grekııaǵa qonys aýdardy. Desek te qasıetti qazaq jerin qıyp ketý oǵan ońaıǵa soqpady. Bastapqyda ol segiz jyl boıy biz jaqqa atbasyn burmady. Desek te saǵynyshy basylmaǵan eken. Osynshama ýaqyt boıy áıgili fýtbolshy Almatyny bir kórsem dep armandapty.
1998 jyly Pehlevanıdiń armany oryndalyp, Qazaqstanmen qaýyshýdyń reti keldi. Almaty áýejaıyna taban tiregen tusta ol qatty qobaljydy. «Qalaı bolar eken?» «Osynshama ýaqyttan keıin jurt ony qalaı qabyldaıdy?» Osyndaı keraǵar sezim boıyn bılegen tusta Evstafııdiń jolyqtyrǵan birinshi adamy – keden qyzmetkeri: «Peha, qalyń qalaı? Jaǵdaıyń jaqsy ma?» dep jyly shyraı bildirdi. Bul sózdi estigende Evstafııdiń qýanyshtan júregi jaryla jazdady. Qobaljýy beker eken, bári de burynǵysha. Ony umytpapty. Ol sonda ǵana óziniń Otanyna kelgenin jan-tánimen sezindi.
Qazirgi kezde de Pehlevanıdıdiń dál sondaı kúıde Almatymen jıi qaýyshýǵa asyǵatyny sondyqtan. Onyń Qazaqstandy keremet jaqsy kóretinin biletin bázbireýler «Seniń ne, eki otanyń bar ma?» dep suraǵan kórinedi. Peha esh oılanbastan «Adamda eki otan bolmaıdy. Meniń de Otanym – bireý, ol – Qazaqstan!» – dep til qatypty. Mine, shynaıy patrıotızm degen osyndaı bolsa kerek!
ALMATY