Jyl ótken saıyn Shymshaharda kópqabatty turǵyn úılerdiń sany arta túsýde. Otandyq jáne sheteldik beldi qurylys kompanııalary turǵyndardyń tańdaýyna saı túrli úlgidegi baspanalar turǵyzyp jatyr. Endigi maqsat osy baspanalardyń sapasy men baǵa qoljetimdiligin baqylaýǵa alý. Osyǵan oraı qala ákimi Murat Áıtenov shaharda qurylysy qarqyn alǵan birqatar nysandy aralady.
Merdiger kompanııa ókilderimen kezdesken qala basshysy qolǵa alǵan jumysty jaýapkershilikpen atqarýdy mindettedi. Eń áýeli Murat Dúısenbekuly Nursát shaǵynaýdanynda 21,5 ga aýmaqta salynyp jatqan úılerdiń qurylysyn aralap kórdi. Mundaǵy 8 úıdiń irgetasynan bastap turǵyzylýyna jaýapty merdiger mekeme - «Art Qurylys» kompanııasy. Basshysy Bekjigit Tólendıevtiń aıtýynsha, qurylysy 2018 jyly bastalǵan nysan bıyl maýsym aıynda paıdalanýǵa berilmek. Árbir úıdiń ishi-syrtyn muqııat kórgen qala ákimi qurylysty óz merziminde tapsyrýdy jáne sapaly atqarýdy eskertti.
«Birinshi kezekte sapaǵa mán berińizder. Turǵyndardan sapaǵa qatysty shaǵym kóp. Eń basty talap – osy. Biz turǵyn úı salýshylarǵa árdaıym qoldaý kórsetemiz. Sizder taraptan sapaly jumys istelinýi kerek. Árıne, qurylys jumystarynyń qala ekonomıkasyna qosar úlesi mol. Qalaǵa keletin ınvestorlar da aldymen qurylys barysyna mán beredi», - dedi qala ákimi.
Onan soń shahar basshysy Turan shaǵynaýdanynda «Shymkent» ÁKK» tapsyrysymen salynyp jatqan 8 úıdiń qurylysyn da aralap kórdi. Munda merdiger «Bek Stroı Servıs» JShS jospar boıynsha jumys júrgizýde. Qurylysy 2018 jyly bastalǵan úıler sáýir jáne maýsym aıynda paıdalanýǵa beriledi.
Sondaı-aq, Murat Dúısenbekuly Turan shaǵynaýdanynda qurylysy aıaqtalǵan mektepte boldy. 1200 oryndy bilim oshaǵy tórtinshi toqsanǵa balalardy qabyldaýǵa daıyn. Jalpy, Shymkent qalasynda bıyl 77 úıdiń qurylysyn júrgizý josparlanǵan. Jumystar kestege saı júrgizilýi tıis.
Qalalyq qurylys basqarmasynyń basshysy Erbol Ahmetovtyń aıtýynsha, qurylysy bıylǵa josparlanǵan 77 úıdiń 24-i kredıttik, 8-i arendalyq. Al Turan shaǵynaýdanynda 41 úıdiń qurylysy júrgiziledi. Memlekettik satyp alý konkýrsy jarııalanǵan.
Shymkent