Halyqaralyq áıelder kúnine oraı qalalyq «Rýhanı jańǵyrý» jobalyq keńsesi «100 jańa esim» jobasynyń jeńimpazy, gıperrealıst-músinshi Aıdos Esmaǵambetpen birlesip, saýda ortalyqtarynda názik jandarǵa kásibı fototúsirilim uıymdastyrdy. Bul týraly qala ákimdiginiń baspasóz qyzmeti habarlady.
Jobanyń maqsaty – qala turǵyndarynyń kóńilin kóterip, qýanyshty sátterdi foto arqyly jetkizý. Kamera obektıvine kezdeısoq túsken elordalyqtar da uıymdastyrýshylarǵa rızashylyqtaryn bildirdi. «Mereke qarsańynda ózimiz fotosessııa jasaýdy josparlap júrgen edik. Búgin qyzdarymmen kóńil kóterip, qalany aralaýǵa shyqqanbyz. Osyndaı jobany júzege asyryp júrgen uıymdastyrýshylarǵa kóp rahmet. Meıramǵa qarsy qyzdarymnyń taǵy bir armany oryndaldy», - dedi kópbalaly ana Jannur Amantaı.
Jobany júzege asyrýshylardyń biri – qylqalam sheberi Aıdos Esmaǵambet. Madam Tıýsso mýzeıinen shabyt alǵan músinshi bolashaqta elimizde sılıkonnan jasalǵan músinder mýzeıin ashýdy armandaıdy. Aıdostyń sheberhanasynda AQSh-tyń 44-prezıdenti Barak Obama, Elbasy Nursultan Nazarbaevtyń, boksshy Gennadıı Golovkınniń músinderi bar.
«Rýhanı jańǵyrý» keńsesi aldaǵy ýaqytta «100 jańa esim» jobasynyń jeńimpazdarymen túrli sharalardy júzege asyrýdy josparlaýda. Sondaı-aq keńseniń oqý ortalyǵynda joba jeńimpazdarymen kezdesýler de uıymdastyrylady.