Qazaq teatr óneriniń sańlaǵy, halqymyzdyń aıaýly qyzy, KSRO halyq ártisi, respýblıka memlekettik syılyǵynyń laýreaty Sholpan Jandarbekova sahnadaǵy san alýan rólderdi óte sheber oınaýymen halyq jadynda qalǵan tulǵalardyń biri ekeni daýsyz.
Myna sýret áıgili ártistiń 1984 jyldyń jazynda Jambyl oblysynyń eń shalǵaıdaǵy Moıynqum aýdanyna sapary kezinde túsirilgen. Atap aıtqanda, Shý aýdany men Moıynqum aýdanynyń shekarasynda úlken óner ıesin qushaq jaıa qarsy alýdyń bir sáti beınelengen.
Aldyńǵy planda shyǵaryp salýshy Shý aýpartkomynyń ekinshi hatshysy Jánibek Maıhanov, onyń sol jaǵynda Moıynqum aýpartkomynyń úshinshi hatshysy Jumabek Orynbaev, oń jaǵynda «Aıdarly» sovhozynyń dırektory Esenaman Oshaqbaev tur.
– Sol kúni keshke, – dep esine alady birneshe sharýashylyqty basqarǵan, uzaq ýaqyt aýdandyq máslıhattyń hatshysy bolǵan Eskeń, Esenaman aǵa, – Sholpan apamyz bastaǵan Áýezov teatrynyń bir top ártisi, ishinde Núketaı Myshbaeva, Qudaıbergen Sultanbaev jáne t.b bar, aýyl klýby janyndaǵy aldyn ala arnaıy daıyndalǵan alańda (tar bolǵandyqtan klýbqa kóp adam syımaıtyn), tamasha óner kórsetip, halyqqa keremet kóńil kúı syılady. Sholpan Jandarbekova men Núketaı Myshbaeva bizdiń úıge qondy. Al Qudaıbergen bastaǵan qalǵandary bir bólimshe meńgerýshisiniń úıinde jatty. Erteńine syıly qonaqtardy aýdan ortalyǵyna jetkizip saldyq.
Iá, sol bir kezderi ataqty ártister, jazýshylar, aqyndar qazaqtyń darqan dalasynyń ár-ár jerindegi alys aýyldarǵa deıin sharshamaı baryp, el-jurtpen shalqaımaı jıi kezdesýshi edi ǵoı...
Berikbaı QADYQOV,
jýrnalıst
Almaty oblysy,
Qarasaı aýdany