Almaty irgesindegi Talǵar aýdanyna qarasty Tuzdybastaý aýyldyq meshitinde mektep oqýshylary arasynda «Imandy urpaq — ult bolashaǵy» atty baıqaý ótti. Quran súrelerin jatqa oqyǵan quraqtaı búldirshinder kópshiliktiń rızashylyǵyna bólenip, baǵaly syılyqtarmen marapattaldy.
Otyz myńnan astam turǵyny bar Tuzdybastaý aýylynda balalardy bilimge baýlyp, otansúıgishtikke tárbıeleıtin túrli úıirmeler jumys isteıdi. Solardyń biri aýyl meshiti janynan ashylǵan arnaıy saýat ashý kýrsy. Munda shákirtter til úırenip, tegin bilim alady. Imandylyq dáristerin boıǵa sińirgen órimdeı óskinderdi yntalandyrý maqsatynda ótken shara alǵash ret uıymdastyrylyp otyr. Bolashaq qarıler qasıetti kitaptyń 16 súresin jáne 20 súresin jatqa oqıtyndar bolyp eki topqa bólinip, ózara synǵa tústi.
– Shákirtterimizdiń betalysy kóńil qýantady. Quran súrelin jattap, maǵynasyna tereń boılaǵan bala jaǵymsyz qasıetterden boıyn aýlaq ustap, tula boıy izgilik pen adamgershilikke tunady. Aınalasyna qamqorlyq kórsetip, ata-anasyna meıirim-shapaǵatty bolyp ósedi. Bir jaǵy arab tilin meńgeredi. Atalǵan baıqaýdyń maqsaty – oqýshylarymyzdy yntalandyryp, zeıinderin ashý. Jarysqa aýdan ımamy Musabek qajy Taǵanuly arnaıy kelip, búldirshinderimizge sát-sapar tiledi. Mundaı ıgi shara dástúrge aınalsa degen tilegimiz bar, – deıdi Tuzdybastaý meshiti janyndaǵy saýat ashý úıirmesiniń ustazy Seıdázim Ábdýalıev.
Quran jarysynda dara shyqqan Nurbolat Áýezhan, Salıh Nadırov, Ismaıl Áshimov, Abdýlazız Ábdimanap, Meıirlan Ábdimanap, Meıirman Orazaly esimdi qatysýshylarǵa meshit qarajaty esebinen velosıped, somakat syndy baǵaly syılyqtar men dıplomdar tabystaldy. Nebári tórtinshi synypta oqıtyn Nurjaqyp Nurdáýletke de yntalandyrý syılyǵy tabys etildi. Baıqaýǵa kórermen retinde kýá bolǵan ata-analar meshit ujymyna óz alǵystaryn bildirdi.